لاہور: صوبہ پنجاب کے شہر بورے والا میں طاقت کے نشے میں چور اسسٹنٹ کمشنر کو غریب گارڈ پر تشدد کرنا مہنگا پڑگیا، ٹمپریچر چیک کرنے پر سیخ پا ہو کر اے سی نے گارڈ پر تشدد کیا تو وفاقی وزیر فیصل واوڈا نے سخت احکامات جاری کروا دیے۔
تفصیلات کے مطابق صوبہ پنجاب کے شہر بورے والا میں نجی اسکول کے گارڈ کو اسسٹنٹ کمشنر کا ٹمپریچر چیک کرنا مہنگا پڑ گیا، ٹمپریچر چیک کرنے پر اسسٹنٹ کمشنر رانا اورنگزیب سیخ پا ہوگئے اور عملے کے ذریعےاسکول گارڈ پر تشدد کروایا۔
اس کے بعد بھی اسسٹنٹ کمشنر کا غصہ ٹھنڈا نہ ہوا تو گارڈ کے خلاف تھانہ ماڈل ٹاؤن میں بدتمیزی کا مقدمہ درج کروا دیا، اسسٹنٹ کمشنر کا حفاظتی عملہ گارڈ کو گھسیٹتے ہوئے تھانے لایا اور حوالات میں بند کروا دیا۔
گارڈ پر تشدد اور تھانے لے جانے کی سی سی ٹی وی فوٹیج سامنے آگئی، فوٹیج میں گارڈ کو اسسٹنٹ کمشنر سے تعارف پوچھتے اور ان کا ٹمپریچر چیک کرتے دیکھا جا سکتا ہے۔
ویڈیو سامنے آنے کے بعد وفاقی وزیر فیصل واوڈا نے معاملے کا نوٹس لے لیا، سماجی رابطے کی ویب سائٹ ٹویٹر پر ٹویٹ کرتے ہوئے انہوں نے کہا کہ اصولاً اس اے سی کا یہی حال ہونا چاہیئے جو اس نے اس غریب گارڈ کا کیا ہے۔
اصولاً تو اس AC کا بھی یہی حال ہونا چاہئے جو اس نے اس غریب گارڈ کا کیا ہے۔ چیف سیکریٹری سے بات کر رہا ہوں۔ اس ACکو معطل کیا جائے اور FIR درج کر کے جیل کی ہوا بھی کھلائی جائے- pic.twitter.com/jouinWvgQt
— Faisal Vawda (@FaisalVawdaPTI) October 1, 2020
فیصل واوڈا کا کہنا تھا کہ چیف سیکریٹری سے بات کر رہا ہوں، اس اسسٹنٹ کمشنر کو معطل کیا جائے اور ایف آئی آر درج کر کے جیل کی ہوا بھی کھلائی جائے۔
