The news is by your side.

Advertisement

فیصل آباد : سفاک شوہر نے بیوی کی زبان کاٹ دی، ملزم گرفتار، مقدمہ درج

فیصل آباد / لاہور : مشتعل شوہر نے بیوی کی زبان کاٹ دی، ملزم کو گرفتار کرکے مقدمہ درج کرلیا گیا، لاہور میں سسرال والوں کے مظالم سے تنگ خاتون نے وزیراعلیٰ پنجاب سے تحفظ کی اپیل کردی۔

تفصیلات کے مطابق فیصل آباد کے علاقے تھانہ صدر پنڈی بھٹیاں کی حدود میں گھریلو جھگڑے کے بعد شوہر نے بیوی پر بہیمانہ تشدد کیا، مضروبہ کو شدید زخمی حالت میں اسپتال منتقل کیا گیا۔

اس حوالے سے اسپتال ذرائع کا کہنا ہے کہ گھریلو جھگڑے کے بعد مشتعل شوہر نے بیوی نسرین کی زبان کاٹ دی، تھانہ صدر پنڈی بھٹیاں پولیس نے ملزم جہانگیر کو گرفتار کرلیا۔

زخمی نسرین کے رشتہ دار نے پولیس کو بتایا ہے کہ جھگڑے کے بعد ملزم جہانگیر نے پہلے نسرین کو طلاق دی پھر اسے قتل کرنے کی کوشش کی، جس کے باعث تیز دھار آلے سے اس کی زبان کٹ گئی۔

دوسری جانب لاہور کے علاقے شاد باغ کی رہائشی خاتون انیلہ مبشر نے شوہر اور ساس کے مظالم سے پریشان ہوکر وزیراعلیٰ پنجاب عثمان بزدار سے تحفظ کی اپیل کی ہے۔

انیلہ مبشر نے اپنی درخواست میں مؤقف اختیار کیا ہے کہ گزشتہ چار سال سے اس کا خاوند اور ساس رسیوں سے باندھ کر اسے پائپ سے شدید تشدد کا نشانہ بناتے رہے ہیں۔

بہیمانہ تشدد کے باعث بچہ بھی پیٹ میں ہی مرگیا۔ متاثرہ خاتون کا کہنا تھا کہ مجھے کمرے میں بند کرکے مارتے اور جسم پر گرم تیل پھینکتے تھے۔

اسما تشدد کیس میں نیا موڑ، ملزم ڈکیتی اور راہزنی کی وارداتوں میں ملوث نکلا

یاد رہے کہ گذشتہ رو زلاہور کی مقامی عدالت میں اسما عزیز تشدد کیس کی سماعت ہوئی تھی، جس کے عدالت نے اسما کے خاوند فیصل اور ملازم کو چار روزہ جسمانی ریمانڈ پر پولیس کے حوالے کردیا.

خیال رہے کہ اسما کے شوہر نے بہیمانہ تشدد کے بعد اس کے بال مونڈھ دیے تھے، وفاقی وزیر برائے انسانی حقوق شیریں مزاری نے واقعے کا فوری نوٹس لیا، جس کے بعد پولیس نے خاتون کے شوہر سمیت 2 افراد کو گرفتار کرلیا گیا، تھانہ کاہنہ میں واقعے کا مقدمہ درج کیا گیا تھا۔

Comments

comments

یہ بھی پڑھیں