The news is by your side.

Advertisement

جعلی آئی ڈی سے آن لائن ٹیکسی چلانے اور خاتون کو ہراساں کرنے والا ملزم گرفتار

کراچی : پولیس نے خاتون کو ہراساں کرنے اور جعلی آئی ڈی سے آن لائن ٹیکسی چلانے والا ملزم گرفتار کرلیا، اسٹریٹ کرائم کی سینچریاں کرنے والے دو ملزمان بھی پکڑے گئے۔

تفصیلات کے مطابق کراچی میں خاتون کو ہراساں اور جعلی آئی ڈی سے آن لائن ٹیکسی چلانے والا ملزم پولیس نے گرفتار کرلیا، اس حوالے سے ایس ایس پی ساؤتھ نے میڈیا کو بتایا کہ ملزم جعلی آئی ڈی پر آن لائن ٹیکسی چلارہا تھا۔

اس کی گاڑی میں ایک خاتون مسافر سفر کررہی تھی کہ اس دوران ملزم نے اسے ہراساں کیا، جس پر خاتون نے پولیس کو ون فائیو پر ہراساں کرنے کی بروقت اطلاع دی تو ملزم نے خاتون سے موبائل فون بھی چھین لیا تھا، پولیس کے مطابق فوری کارروائی کے بعد ملزم کو حراست میں لے لیا گیا ہے۔

علاوہ ازیں گلشن اقبال پولیس نے اسٹریٹ کرائم کی سینچریاں کرنے والے دو ملزمان کو گرفتار کرلیا، ایس ایس پی ایسٹ اظفر مہیسر کے مطابق ملزمان نعمان اور افضل پولیس کو انتہائی مطلوب ملزمان کی فہرست میں شامل تھے۔

جرائم کی وارداتیں کرنے والے دونوں ملزمان درجنوں مرتبہ جیل بھی کاٹ چکے ہیں، انہوں نے بتایا کہ ملزمان گزشتہ کئی سالوں کے دوران اسٹریٹ کرائم کی سیکڑوں وارداتیں کر چکے ہیں، گرفتار ملزمان موٹر سائیکل لفٹنگ اور منشیات فروشی کی وارداتیں بھی کرتے تھے۔

اس سے قبل ملزمان کراچی کے تقریباً تمام تھانوں کے ہاتھوں متعدد مرتبہ گرفتار ہوچکے ہیں، ایس ایس پی ایسٹ کا مزید کہنا تھا کہ ملزمان کے قبضے سے دو پستول، دو کلو چرس، موٹرسائیکل اور چھینے گئے موبائل فون برآمد کیے گئے ہیں، گلشن اقبال پولیس گرفتار ملزمان سے مزید تفتیش کررہی ہے۔

Comments

comments

یہ بھی پڑھیں