کراچی میں گلوکار فخرعالم پولیس گردی کا شکار singer Fakhar e Alam
The news is by your side.

Advertisement

کراچی میں گلوکار فخرعالم پولیس گردی کا شکار

کراچی: شہرقائد کے علاقے کلفٹن میں معروف گلوکار فخر عالم پولیس گردی کا شکار ہوگئے، فخر عالم کی کار کو پولیس موبائل نے پیچھے سے ٹکر ماری اور مبینہ طور پر دھمکیاں دیں، آئی جی سندھ نے واقعے کا نوٹس لے لیا۔

تفصیلات کے مطابق کراچی کے علاقے کلفٹن میں پروٹوکول موبائل نے فخر عالم کی گاڑی کو پیچھے سے ٹکر ماری، مسلح گارڈ دھمکانے آیا، فخر عالم نے گاڑی سے اتر کر ویڈیو بنانا شروع کی تو افسر کی گاڑی آگے بڑھ گئی۔

گلوکار فخرعالم نے کہا کہ پولیس موبائل میں بیٹھے سادہ لباس اہلکاروں نے بتانے سے انکار کردیا کہ پروٹوکول کس کا تھا، گاڑی سے اترا تو پولیس والوں نے پہچان لیا، پروٹوکول لینے والا افسر مجھے دیکھ کر بھاگ کھڑا ہوا۔

فخرعالم نے کہا کہ ان کی جگہ کوئی عام شخص ہوتا تو اہلکار اس کے ساتھ کیا کرتے سب جانتے ہیں، پولیس موبائل میں تمام اہلکار سادہ لباس میں تھے، فخر عالم بار بار سوال پوچھتے رہے لیکن اہلکاروں نے یہ نہیں بتایا کہ وہ کس افسر کے پروٹوکول پر ہیں۔

فخر عالم نے اہلکاروں پر غصہ کرتے ہوئے کہا یہ پرانا پاکستان نہیں ہے اب یہ نہیں چلے گا، انہوں نے مزید کہا کہ اگر اہلکار گاڑی سے اتر کر تمیز سے بات کرتے اور معذرت کرلیتے تو میں اسی وقت جانے دیتا۔

پولیس گردی کی خبر میڈیا پر نشر ہونے کے بعد آئی جی سندھ نے نوٹس لیتے ہوئے ڈی آئی جی ساؤتھ سے واقعے کی رپورٹ طلب کرلی ہے۔

Comments

comments

یہ بھی پڑھیں