The news is by your side.

Advertisement

فخر عالم کا ’مشن پرواز‘ کتابی صورت میں‌ شائع

کراچی: پاکستانی گلوکار و اداکار فخرعالم نے ’’مشن پرواز‘‘ کا سفر نامہ کہانی کی صورت میں شائع کردیا۔

تفصیلات کے مطابق فخر عالم گزشتہ برس تین نومبر کو اپنا دنیا بھر کا سفر مکمل کرنے کے بعد کراچی واپس پہنچے اور انہوں نے دنیا بھر کا چکر لگانے والے پہلے پاکستانی ہونے کا اعزاز اپنے نام کیا۔

پاکستانی گلوکار کو مشن پرواز پر حکومت اور پوری قوم نے بہت زیادہ سراہا جس کی وجہ سے انہیں فخر پاکستان بھی قرار دیا گیا۔

تین نومبر کو تاریخی سفر کا ایک برس مکمل ہونے پر فخر عالم نے دستاویزی فلم جاری کی اور اعلان کیا تھا کہ وہ جلد اپنی کہانی کتاب کی صورت میں شائع کریں گے۔

فخر عالم نے اب ’مشن پرواز‘ کتاب شائع کردی، اس ضمن میں انہوں نے سماجی رابطے کی ویب سائٹ پر ایک ویڈیو بھی شیئر کی جس میں انہوں نے بتایا کہ میرے لیے نومبر کا مہینہ بہت خاص ہے کیونکہ دو نومبر کو میرے ہاں بیٹے کی پیدائش ہوئی اور تین نومبر کو مشن پرواز مکمل کیا۔

انہوں نے لکھا کہ اہم بات یہ ہے کہ مشن پرواز کا سفر نامہ کتاب کی صورت میں شائع ہوگیا۔ انہوں نے بتایا کہ کتاب جلد ایمازون پر دستیاب ہوگی البتہ ابھی یہ لبرٹی بکس کی تمام شاخوں پر دستیاب ہے۔

فخر عالم کا کہنا تھا کہ میرے لیے آج کا دن اس لیے بھی خاص ہے کہ میں نے مشن پرواز صدر مملکت ڈاکٹر عارف علوی اور ڈی جی آئی ایس پی آر میجر جنرل آصف غفور کو بھی پیش کی۔

پاکستانی گلوکار یہ کتاب اب تک کئی نامور سیاسی و شوبز شخصیات کو دے چکے ہیں جن کے حوالے سے انہوں نے ٹویٹ بھی کیا۔


 

Comments

comments

یہ بھی پڑھیں