کراچی: شہر قائد میں ایک کمپنی ملازم کو 15 پر ڈکیتی کی جھوٹی اطلاع دینا مہنگا پڑ گیا، شاہ لطیف پولیس نے احمد سالم نامی شہری کو گرفتار کر لیا۔
تفصیلات کے مطابق ون فائیو پر جھوٹی کال کر کے اپنی ہی کمپنی کو 83 ہزار روپے کا نقصان پہنچانے کی کوشش کرنے والا ملزم احمد سالم شاہ لطیف پولیس کے ہاتھوں گرفتار ہو گیا۔
رپورٹ کے مطابق ملزم احمد نے 15 پر ڈکیتی کی اطلاع دی تھی، جب پولیس اہل کار موقع واردات پر پہنچے تو وہاں موجود نجی کمپنی کے ملازم احمد ولد سالم نے بتایا کہ اسے 2 موٹر سائیکل سوار مسلح ملزمان نے لوٹ لیا ہے، ملزمان اس سے 83 ہزار روپے اور موبائل فون لوٹ کر لے گئے۔
پولیس رپورٹ کے مطابق اہل کاروں نے شک کی بنا پر ملزم کی سوزوکی کے اندر تلاشی لی، تو ان کو ایک شاپر میں لپٹا ہوا موبائل فون اور 83 ہزار روپے کی رقم مل گئی۔
پوچھ گچھ پر گرفتار ملزم احمد سالم نے بتایا کہ وہ کمپنی میں رائیڈر کی نوکری کر رہا ہے، اسے پیسوں کی ضرورت تھی، اس لیے ڈکیتی کا جھوٹا ڈراما رچانے کی کوشش کی۔ پولیس نے ملزم کے خلاف مقدمہ درج کر کے تفتیش شروع کر دی ہے۔
