نئی دہلی: بھارت میں معروف یوٹیوبر گوراو کو احمقانہ ویڈیو بنانا مہنگا پڑگیا، صارفین کے شدید غم وغصے کے بعد پولیس نے کارروائی کرتے ہوئے اسے گرفتار کرلیا۔
غیرملکی خبررساں ادارے کی رپورٹ کے مطابق یوٹیوب پر تقریباً 4 ملین سبسکرائبرز رکھنے والے گوراو نے اپنی ویڈیو میں کتے کو گیس کے غبارے سے باندھ کر اڑانے کی کوشش کی تھی، جس پر جانوروں سے محبت کرنے والے افراد سمیت دیگر صارفین نے یوٹیوبر کو شدید تنقید کا نشانہ بنایا۔
پولیس نے کارروائی کرتے ہوئے بھارتی یوٹیوبر کو گرفتار کرلیا۔ عوامی ردعمل کو مدنظر رکھتے ہوئے گوراو نے ناصرف ویڈیو ڈلیٹ کی بلکہ صارفین سے معافی بھی مانگی۔
ویڈیو میں دیکھا گیا کہ گوراو نے پہلے ڈالر نامی کتے کو درجنوں غباروں کے ساتھ باندھ کر چلانے کی کوشش کی بعد ازاں اس نے اضافی گیس کے غبارے لگائے اور گاڑی کی چھت پر بیٹھ کر اڑانے کی کوشش کی۔
صارفین نے دیکھا کہ کتا اڑتا ہوا گھر کی بالکونی سے ٹکرایا۔ ان مناظر پر شہریوں نے انتہائی دکھ کا بھی اظہار کیا۔
یوٹیوبر نے اپنی غلطی کا اعتراف کرتے ہوئے کہا مجھے ایسا نہیں کرنا چاہیے تھا، میں خود بھی جانوروں سے پیار کرتا ہوں، اپنی غلطی پر تمام لوگوں سے معافی چاہتا ہوں۔
