سہارنپور : بھارت میں کسان تحریک اپنے زوروں پر ہے لیکن مودی سرکار ان کی بات ماننے کو تیار نہیں، تنگ آکر کسانوں نے گیہوں کی فصل پر ٹریکٹر چلاکر اسے ضائع کردیا۔
بھارتی ریاست اتر پردیش کے ضلع سہارنپور میں زرعی قوانین کے خلاف کسانوں نے اپنی گیہوں کی فصل پر احتجاجاً ٹریکٹر چلا دیا، اپنے ہاتھوں سے لگائی فصل کو برباد کرنے کے بعد کسان مایوسی کے ساتھ گھر واپس لوٹ گئے۔
ضلع سہارنپور کے تحصیل بہٹ علاقہ کے گاؤں ڈھابہ میں بہت سے کسانوں نے گنے کی ادائیگی نہ ہونے، زرعی قوانین کی مخالفت میں جاری کسان تحریک کی سنوائی نہ ہونے اور بجلی کے زائد بلوں کی وجہ سے گیہوں کی فصل کو ٹریکٹر چلا کر برباد کردیا۔
اس حوالے سے کسانوں نے مودی حکومت سے مایوسی کا اظہار کرتے ہوئے کہا کہ زرعی قوانین کی کافی عرصے سے مخالفت ہورہی ہے لیکن حکومت کسانوں کی بات سننے کو تیار نہیں۔’
کسانوں کا کہنا ہے کہ اب وہ صرف اتنی ہی فصل اُگائیں گے، جس سے ان کے گھر کا گزر بسر ہوسکے وہ اب حکومت کو فروخت کرنے کے لئے فصلیں نہیں اگائیں گے۔
