مظفرنگر : کانگریس کی جنرل سیکریٹری پریانکا گاندھی نے کہا ہے کہ وزیر اعظم مودی ساری دنیا گھوم رہے ہیں لیکن اپنے کسانوں کے پاس نہیں آئے۔
مظفرنگر میں ایک اجتماع خطاب کرتے ہوئے پریانکا گاندھی نے سوال کیا کہ دہلی کا بارڈر وزیر اعظم کی رہائش سے کتنا دور ہے؟ وہ پاکستان گئے، چین گئے پوری دنیا کا دورہ کرکے واپس آگئے لیکن کسانوں کے پاس کیوں نہیں پہنچے۔
کسان تحریک کے حوالے سے زرعی قوانین کی تشریح کرتے ہوئے ان کا کہنا تھا کہ جو تین متنازعہ قوانین اس حکومت نے نکالے ہیں ان کے بارے میں آپ تو جانتے ہی ہیں۔
انہوں نے کہا کہ پہلے قانون کے نفاذ سے سرکاری منڈیاں بند کردی جائیں گی، نجی منڈیوں کے کھلنے سے بڑے بڑے کھرب پتی سرمایہ داروں کی من مانی ہوگی۔
پرینکا گاندھی نے کہا کہ دوسرے قانون میں لکھا ہے کہ کنٹریکٹ فارمنگ ہوگی یعنی بڑے بڑے کھرب پتی آپ کے گاؤں آکر سودا کریں گے اور وہ اپنی مرضی سے فصل پیدا کروائیں گے۔
انہوں نے کہا کہ بعد میں انہیں یہ اختیار بھی حاصل ہوگا کہ وہ اس فصل کو خریدنے سے انکار بھی کرسکتے ہیں کیونکہ اس قانون کے مطابق آپ عدالت میں نہیں جاسکتے اور نہ ہی آپ اپنے حق کے لیے لڑسکتے ہیں۔