The news is by your side.

Advertisement

پارٹی نے تنظیمی بحران کا حل نکال لیا، جلد اعلان کروں گا، فاروق ستار

کراچی: ایم کیو ایم پاکستان کے سربراہ فاروق ستار نے کہا ہے کہ مہاجروں کے مسائل حل کرنے کے لیے مہاجر قوم کا اتحاد ضروری ہے، پارٹی نے تنظیمی بحران کا حل نکال لیا ہے جلد اعلان کروں گا۔

ان خیالات کا اظہار انہوں نے میڈیا سے گفتگو کرتے ہوئے کیا، فاروق ستار نے کہا کہ مہاجر اتحاد قائم کرنے کا فیصلہ کرچکا ہوں، ایک دو روز میں وفد سیاسی جماعتوں، دانشوروں سے ملاقات کرے گا۔

انہوں نے کہا کہ مہاجر اتحاد سے سندھ کے مظلوم بھائیوں سے مل کر جائز حق حاصل کریں گے، ماضی میں ہونے والی ناانصافیوں پر بھرپور طریقے سے آواز اٹھائیں گے، ایم کیو ایم پاکستان مہاجر یکجہتی کے لیے سب سے بات کرے گی۔

مقبوضہ کشمیر میں بھارتی جارحیت پر فاروق ستار نے کہا کہ ایم کیو ایم پاکستان کا ہر کارکن کشمیری بھائیوں سے اظہار یکجہتی کرتا ہے، اقوام متحدہ اور عالمی تنظیمیں بھارتی دہشت گردی کے خلاف آواز اٹھائیں۔

مزید پڑھیں: جینامرنا ایم کیو ایم کےساتھ ہی ہے، پتنگ کے ساتھ رومانس ہے، نہیں چھوڑ سکتا، فاروق ستار

واضح رہے کہ فاروق ستار کا کہنا تھا کہ جینا مرنا ایم کیو ایم کے ساتھ ہے کسی اور سیاسی جماعت میں کبھی نہیں جاؤں گا، 35 سال پارٹی کے ساتھ گزارے آگے بھی اسی کے ساتھ رہوں گا۔

ان کا کہنا تھا کہ تنظیم میں بحران کو حل کرنے کے لیے اپنا سیاسی تجربہ استعمال کررہا ہوں، میری انا کا مسئلہ نہیں ہے یہ مسئلہ جلد حل ہوجائے گا، فیصلے کے بعد اب کنوینر میں اور پارٹی میرے نام سے رجسٹرڈ ہے، الیکشن کمیشن کو اب میرا نام ویب سائٹ پر اپ ڈیٹ کرنا چاہئے۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیاپر شیئر کریں۔

Comments

comments

یہ بھی پڑھیں