ڈاکٹر فاروق ستار نے رابطہ کمیٹی کی رکنیت سے استعفیٰ دے دیا -
The news is by your side.

Advertisement

ڈاکٹر فاروق ستار نے رابطہ کمیٹی کی رکنیت سے استعفیٰ دے دیا

کراچی: ایم کیو ایم پاکستان کے سابق کنونیئر اور رہنما ڈاکٹر فاروق ستار نے رابطہ کمیٹی کی رکنیت سے استعفیٰ دے دیا۔

ڈاکٹر فاروق ستار کی جانب سے جاری بیان میں کہا گیا ہے کہ رابطہ کمیٹی اور پارٹی رکنیت سے مستعفیٰ ہونے کا فیصلہ ذاتی وجوہات کی بنیاد پر کیا اور انہوں نے اپنا استعفیٰ ایم کیو ایم پاکستان کی قیادت کو ارسال کردیا۔

دوسری جانب ایم کیو ایم پاکستان کی رابطہ کمیٹی نے فاروق ستار کے استعفیٰ پر تشویش کا اظہار کرتے ہوئے انہیں ایک بار پھر منانے اور تمام تحفظات دور کرنے کا عندیہ دے دیا۔

ایم کیو ایم کی جانب سے جاری اعلامیے کے مطابق رابطہ کمیٹی نے فاروق ستار کے استعفیٰ کو ماننے سے انکار کرتے ہوئے اسے کسی بھی صورت قبول نہ کرنے کا فیصلہ کیا۔

مزید پڑھیں: تحریک انصاف میں شمولیت پرقریبی دوستوں سے مشاورت کر رہا ہوں ‘ فاروق ستار

واضح رہے کہ ڈاکٹر فاروق ستار ملک بھر میں ہونے والے حالیہ عام انتخابات کے بعد سے پارٹی میں غیر فعال تھے انہوں نے گزشتہ دنوں اشارہ دیا تھا کہ تحریک انصاف کے کچھ دوستوں نے پی ٹی آئی میں شمولیت کی دعوت بھی دی۔

ایم کیوایم پاکستان کے سابق کنونیئر نے کہا تھاکہ تحریک انصاف کی جانب سے ملنے والی دعوت پر کچھ دوستوں سے مشاورت جاری ہے، آئندہ کے لائحہ عمل کا اعلان جلد کروں گا۔

خیال رہے کہ رواں برس فروری میں سینیٹ انتخابات میں کامران ٹیسوری کو امیدوار بنانے کے معاملے پر ایم کیو ایم کے اندرونی اختلافات شدت اختیار کرگئے تھے جس کے بعد متحدہ کے دو دھڑے (پی آئی بی اور بہادرآباد) بن گئے تھے۔

یہ بھی پڑھیں: خالدمقبول صدیقی جھوٹ بولیں لیکن حد رکھیں، فاروق ستار

ایم کیو ایم رابطہ کمیٹی نے پارٹی آئین کے تحت دو تہائی اکثریت ملنے کے بعد فاروق ستار کو پارٹی قیادت سے ہٹا دیا تھا جس پر انہوں نے اسلام آباد ہائی کورٹ سے رجوع بھی کیا، عدالت نے فیصلہ جاری کرتے ہوئے ڈاکٹر خالد مقبول صدیقی کو ایم کیو ایم پاکستان کا کنونیئر قرار دیا۔

Comments

comments

یہ بھی پڑھیں