فیشن انڈسٹری کی معروف ماڈل روبینہ خان نے خاموشی سے نئی زندگی کے آغاز پر متعدد شوز و فیشن شخصیات نے انہیں مبارک باد پیش کی۔
معروف ماڈل روبینہ خان نے گزشتہ رفوز انسٹاگرام پر شریک سفر کے ہمراہ تصویر شیئر کرتے ہوئے ’قبول ہے‘ لکھا جس کے بعد متعدد ماڈلز و اداکاراؤں نے انہیں مبارک باد پیش کی۔
روبینہ کی جانب سے شیئر کی گئی تصویر میں انہیں عروسی لباس میں دیکھا جاسکتا ہے جبکہ انہیں اور ان کے جیون ساتھی کے گلے میں پھولوں کے ہار بھی دیکھے جاسکتے ہیں۔
روبینہ خان نے واضح نہیں کیا کہ انہوں نے صرف نکاح کیا ہے یا پھر وہ سادگی سے پیا گھر سدھار گئیں؟ تاہم ان کی جانب سے شیئر کی گئی تصویر سے عندیہ ہوتا ہے کہ انہوں نے خاموشی سے شادی کرلی۔
ماڈل نے انسٹاگرام اسٹوریز میں ہمسفر کے ساتھ متعدد تصاویر شیئر کرتے ہوئے بتایا کہ انہوں نے نکاح کیا، تاہم فیشن میگزین ’اوکے‘ نے بتایا کہ ماڈل نے شادی کرلی۔
روبینہ خان نے اپنے ہمسفر سے متعلق بھی کوئی وضاحت نہیں کی، تاہم چہ مگوئیاں ہیں کہ ان کے ساتھی کا تعلق شوبز انڈسٹری سے نہیں ہے۔
روبینہ خان کی تصویر پر اداکارہ اریبہ حبیب، ماڈل و اداکارہ صدف کنول، ماڈل تبسم مغل، اداکار و ماڈل عدنان انصاری اور نمرہ خان سمیت دیگر شخصیات نے انہیں مبارک باد پیش کی۔
روبینہ خان نے 2015 کے بعد ماڈلنگ کا آغاز کیا تھا اور انہوں نے متعدد میک اپ اور ملبوسات برانڈز سمیت جوتوں اور فٹنیس برانڈز کے ساتھ بھی کام کیا ہے۔
روبینہ خان نے نہ صرف پاکستان بلکہ بیرون ملک بھی ماڈلنگ کے منصوبوں پر کام کیا اور ان کا شمار خوبصورت ماڈلز میں کیا جاتا ہے۔
