ریاض: سعودی عرب میں کرونا وائرس کی پابندیاں ختم ہونے کے بعد فاسٹ فوڈ ریستورانوں کے بزنس میں اضافہ دیکھا جارہا ہے۔
اردو نیوز کے مطابق سعودی عرب میں فاسٹ فوڈ کے بزنس میں ریکارڈ اضافہ دیکھا گیا ہے، گزشتہ برس کے دوران مارکیٹ کا حجم 15.5 ارب ریال تک پہنچ گیا۔
فاسٹ فوڈ ریستورانوں کی آمدنی میں سال 2021 کے دوران 29 فیصد سے زیادہ اضافہ ہوا جبکہ 2020 کے دوران کرونا وائرس سے بچاؤ کے لیے مقرر پابندیوں کی وجہ سے فاسٹ فوڈ ریستورانوں کی مارکیٹ متاثر ہوئی تھی۔
فاسٹ فوڈ ریستورانوں میں سب سے زیادہ برگر کی مانگ ہے، اس کا حصہ 2021 کے اعداد و شمار کے مطابق 30 فیصد جبکہ مارکیٹ 6 ارب ریال رہی۔
برگر صارفین میں غیر معمولی طور پر مقبول ہے، توقع کی جارہی ہے کہ آئندہ 4 برسوں میں اس کی سالانہ شرح نمو 4 فیصد سے تجاوز کر جائے گی۔
اس حوالے سے ایک رپورٹ میں بتایا گیا کہ فاسٹ فوڈ ریستوران تین زمروں میں آتے ہیں، پہلا برگر کا ہے جس کی طلب سب سے زیادہ ہے جبکہ دوسرے نمبر پر شوارما اور پھر تیسرے نمبر پر گرلڈ چکن اور پیزا ہے۔
