ملکوال: منڈی بہاؤالدین کے شہر ملکوال میں سنگدل باپ نے اپنی 20 سالہ بیٹی کو قتل کردیا۔
اے آر وائی نیوز کی رپورٹ کے مطابق منڈی بہاؤ الدین کے شہر ملکوال میں سنگدل باپ اپنی تیسری شادی کی راہ میں رکاوٹ بننے والی 20 سالہ بیٹی کو موت کے گھاٹ اتار کر فرار ہوگیا، پولیس نے مقدمہ درج کرکے ملزمان کی تلاش شروع کردی۔
پولیس کے مطابق 20 سالہ مقتولہ عائشہ غلام کا تعلق ضلع حافظ آباد کے علاقہ بہاؤ الدین سے ہے۔
پولیس کا کہنا ہے کہ ملزم غلام علی کی پہلی بیوی کا انتقال اور دوسری کو وہ خود ہی طلاق دے چکا ہے۔ پولیس نے مقتولہ کے چچا کی درخواست پر باپ اور نامعلوم ملزمان کیخلاف تھانہ گوجرہ میں مقدمہ درج کرلیا۔
مزید پڑھیں: غربت سے تنگ باپ نے 8ماہ کی بیٹی کو قتل کرکے دفنا دیا
ذرائع کا کہنا ہے کہ مقتولہ عائشہ غلام کی لاش جنڈبوسال کے قریب سڑک کنارے سے ملی تھی، لاش کو ضابطے کی کارروائی کے لیے اسپتال منتقل کردیا گیا ہے۔
پولیس کے مطابق ملزمان کی گرفتاری کے لیے چھاپے مارے جارہے ہیں، پوسٹ مارٹم کی رپورٹ آنے کے بعد مزید کارروائی کا آغاز کیا جائے گا۔
واضح رہے کہ تین ماہ قبل چونیاں کے علاقے میں غربت سے تنگ باپ نے 8 ماہ کی بچی قتل کرکے صحن میں دفنا دی تھی، پولیس نے مقتول بچی کے باپ اور ماں کو گرفتار کر لیا اور لاش برآمد کرلی تھی، بچی کی لاش کوٹی ایچ کیواسپتال منتقل کردیا گیا تھا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں