امریکی ریاست ٹیکسس میں باپ کی حاضر دماغی نے اس کے بچوں اور ان کی نگران کو 12 فٹ طویل مگر مچھ سے بچا لیا، باپ کی ذرا سی بھی سستی خوفناک حادثے کا سبب بن سکتی تھی۔
ٹیکسس کے رہائشی اینڈریو کا کہنا ہے کہ واقعے کے وقت وہ اپنے گھر میں موجود تھا جب اس نے دیکھا کہ اس کے گھر کے پیچھے موجود کنال سے ایک خطرناک مگر مچھ باہر آیا۔
اس وقت بچے اپنی نگران کے ساتھ وہیں موجود تھے اور کھیل رہے تھے۔ کنال سے 12 فٹ طویل اور 270 کلو گرام وزنی مگر مچھ نکلا تو باپ اچھل کر باہر آیا۔
باپ کے وہاں پہنچنے تک مگر مچھ کافی نزدیک آچکا تھا تاہم وہ بچوں اور ان کی نگران کو وہاں سے باہر نکالنے میں کامیاب رہا، اس دوران وہ مدد کے لیے آوازیں بھی لگاتا رہا۔
اینڈریو کی مدد کی کال پر ریسکیو اہلکار وہاں پہنچے تو انہیں مگر مچھ کو پکڑنے میں کافی وقت لگا، وزنی مگر مچھ کو پانی سے نکالنے میں انہیں 3 گھنٹے کا وقت لگا۔
پانی سے باہر نکال کر مگر مچھ کو منہ پر کپڑا باندھ کر اور رسیوں میں جکڑ کر قریبی تھیم پارک منتقل کردیا گیا۔
