اسلام آباد : وفاقی وزیر سائنس و ٹیکنالوجی فواد چوہدری نے کہا ہے کہ چاند کی پیدائش ہوگئی ہے، لوگ کل چاند دیکھ کر تسلی کرسکتے ہیں، مفتی منیب الرحمان اورشہاب الدین پوپلزئی کو ڈیمو دینے کو تیار ہیں۔
ان خیالات کا اظہار انہوں نے اسلام آباد میں پریس کانفرنس سے خطاب کرتے ہوئے کیا، فواد چوہدری نے کہا کہ آج 3بج کر دو منٹ پر چاند کی پیدائش ہوگئی ہے۔
آج چاند نہیں دیکھ سکتے کیونکہ سورج کے غروب اور چاند کا ایک ہی وقت ہے، تاہم کل کراچی اور گوادر کی ساحلی پٹی پر عید کا چاند آسانی سے دیکھا جاسکے گا۔
فواد چوہدری نے مزید کہا کہ ہم نے جو بنیاد بنائی ہے، پاکستان کی سرحدوں کے اندر چاند نظرآنا چاہئے، موبائل ایپ بنادی ہے، چاند کی رویت سے متعلق تمام معلومات ہیں، کراچی اور گوادر کی ساحلی پٹی میں کل چاند بغیر کسی دوربین کے بھی دیکھا جاسکے گا۔
انہوں نے بتایا کہ محکمہ موسمیات کی 66 مقامات پر دور بینیں لگی ہوئی ہیں شہری ان مقامات پر جا کر چاند دیکھ سکتے ہیں ہم نے ہجری کیلنڈر بنا کر ویب سائٹ پر ڈال دیا ہے۔
مزید پڑھیں : عیدین سمیت اسلامی مہینوں کا چاند دیکھنے کے لیے موبائل ایپ متعارف
فواد چوہدری نے کہا کہ منگل کو پاکستان میں آخری روزہ ہوگا اور بدھ کو پورے ملک میں ایک ساتھ عید منائی جائے گی، ہم چاہتے ہیں کہ عید کی خوشیاں ایک ساتھ ہی منائی جائیں۔
وفاقی وزیر نے کہا کہ موبائل ایپ کو سیٹلائٹ سے جوڑا گیا ہے، کل تمام لوگ چاند دیکھ کراپنی تسلی بھی کرسکتے ہیں، اس حوالے سے مفتی منیب الرحمان اورشہاب الدین پوپلزئی کو ڈیمو دینے کو بھی تیار ہیں۔
