لاہور : تحریک انصاف کے مرکزی رہنما فواد چوہدری کو اسلام آباد پولیس نے گرفتار کر لیا، آج لاہور کی عدالت سے راہداری ریمانڈ لے کر اسلام آباد پہنچایا جائے گا۔
تفصیلات کے مطابق سابق وفاقی وزیر اور پی ٹی آئی کے مرکزی رہنما فواد چوہدری کو لاہور سے صبح سویرے اسلام آباد پولیس نے گرفتارکرلیا۔
ذرائع نے بتایا ہے کہ فواد چوہدری کو لاہور کی عدالت سے راہداری ریمانڈ لے کر اسلام آباد پہنچا دیا جائے گا۔
فواد چوہدری کی اہلیہ نے بتایا کہ فواد چوہدری کو لے جانے والےپولیس یونیفارم میں تھے، ان کو کس جگہ منتقل کیا گیا ہے معلوم نہیں ، کسی مقدمے میں گرفتارکیاگیا ہے تو ہمیں بتایاجائے۔
فرخ حبیب نے گرفتاری کی تصدیق کرتے ہوئے گرفتاری کے لئے آنے والی پولیس وینزکی ویڈیو بھی ٹوئٹ کی اور کہا حکومت بوکھلاہٹ کا شکار ہوگئی ہے۔
یاد رہے رات گئے تحریک انصاف کے رہنما فواد چوہدری نے گفتگو کرتے ہوئے کہا تھا کہ لاہور پولیس عمران خان کو گرفتارکرنےکی مذموم کوشش کرنا چاہ رہی ہے، عمران خان زمان پارک میں موجود ہیں،آؤ گرفتار کرکے دکھاؤ۔
فواد چوہدری کا کہنا تھا کہ عمران خان کوگرفتارکرناپاکستان کےخلاف ایک سازش ہے، پاکستان اس وقت معاشی بحران کاسامنا کررہاہے، عمران خان کو گرفتار کرکے کیا پاکستان میں آگ لگانا چاہتے ہیں؟
