اسلام آباد: تحریک انصاف کے رہنما فواد چوہدری کا کہنا ہے کہ بینچ بنانا تو چیف جسٹس پاکستان کا اختیار ہے لیکن دباؤ میں فیصلہ نہیں آنا چاہیے۔
اے آر وائی نیوز کے مطابق پی ٹی آئی رہنما فواد چوہدری نے سپریم کورٹ کے باہر میڈیا سے گفتگو کرتے ہوئے کہا کہ لوگوں نے فیصلہ دے دیا کہ انتخابات کی طرف جائیں لیکن یہ لوگ سپریم کورٹ کو بلیک میل کرنے کی کوشش کررہے ہیں۔
انہوں نے کہا کہ یہ سلسلہ اب نہیں چل سکتا اب ملک میں بڑے فیصلے جلد کرنا ہوں گے فل کورٹ فل کورٹ بنانا چیف جسٹس کا اختیار ہے مگردباؤ ڈال کر نہیں ہوسکتا اگراس طرح سے فیصلے ہونے ہیں توناقابل قبول ہیں۔
سابق وفاقی وزیر نے کہا کہ ن لیگ کو دھاندلی کے بغیراقتدارمیں آنے کی عادت ہی نہیں ہے اور آج انہوں نے بچوں کی طرح ایڑیاں رگڑنا شروع کردیں۔
مزید پڑھیں: ڈپٹی اسپیکر رولنگ کیس: فل کورٹ بنے گا نہیں ؟ فیصلہ محفوظ
فواد چوہدری نے کہا کہ اپنے ذاتی مفاد کو پیچھے رکھیں اور ملک کے لیے آگے بڑھیں اس میں جتنی تا خیرہوگی اتنی معیشت کے لیے مسائل بڑھیں گے ان لوگوں کو معیشت اور ملک کی نہیں صرف اپنے اقتدار کی پرواہ ہے۔
انہوں نے کہا کہ تین ماہ سے پنجاب میں کوئی حکومت نہیں ہے اب ملک میں الیکشن کی طرف جائیں اورنئے الیکشن کمشنر پربات چیت شروع کریں اور عوام کو اپنی حکومت چننے کا حق دیا جائے۔
واضح رہے کہ ڈپٹی اسپیکر رولنگ کیس میں فل کورٹ بنے گا یا نہیں اس کا فیصلہ محفوظ کرلیا گیا ہے جو اب سے کچھ دیر بعد سنایا جائے گا۔
