اسلام آباد: وفاقی وزیر اطلاعات فواد چوہدری کا کہنا ہے کہ اپوزیشن کی آل پارٹیز کانفرنس پر ہمیں کوئی اعتراض نہیں ہے۔ اپوزیشن جتنے چاہے اے پی سی کر لے کوئی فرق نہیں پڑے گا۔
تفصیلات کے مطابق وفاقی وزیر اطلاعات فواد چوہدری کا کہنا ہے کہ ہمارا مقصد صرف اور صرف پاکستان کو ترقی دینا ہے۔ حکومت کا مقصد پاکستان سے کرپشن کا خاتمہ کرنا ہے۔
انہوں نے کہا کہ احتساب کا عمل ملک بھر میں جاری ہے۔ جن لوگوں نے گاجریں کھائی ہیں ان کے پیٹ میں مروڑ تو ہوں گے۔ جن لوگوں نے کرپشن نہیں کی انہیں ڈرنے کی ضرورت نہیں۔
فواد چوہدری کا کہنا تھا کہ احتساب کا عمل ملک بھر میں بلا امتیاز جاری رہے گا۔ کالا دھن سفید کرنے والوں کے چہرے پیلے پڑ گئے ہیں۔
انہوں نے کہا کہ اپوزیشن کی آل پارٹیز کانفرنس پر ہمیں کوئی اعتراض نہیں ہے۔ اپوزیشن جتنے چاہے اے پی سی کر لے کوئی فرق نہیں پڑے گا۔
وزیر اطلاعات نے مزید کہا کہ اپوزیشن کے پاس کوئی لیڈر شپ ہے نہ نظریہ، صرف لوٹے گئے پیسے بچانے کے لیے سیاست ہو رہی ہے۔
اس سے پہلے فواد چوہدری نے اپنے ٹویٹ میں کہا تھا کہ خواجہ حارث سینئر وکیل ہیں، انہوں نے نواز شریف کیس کی کروڑوں روپے فیس لی، خواجہ حارث فیس نہ لیتے تو مانتے کہ نواز شریف کو سزا ہونی چاہیئے۔
