اسلام آباد: وزیر اعظم عمران خان نے فواد چوہدری کو صوبہ سندھ کے حوالے سے خصوصی ٹاسک دے دیا جس کے بعد وزیر اطلاعات کا دورہ سندھ متوقع ہے۔
ذرائع کا کہنا ہے کہ پاکستان پیپلز پارٹی کے رہنماؤں کا جعلی اکاؤنٹس کیس کی مشترکہ تحقیقاتی ٹیم (جے آئی ٹی) میں نام آنے کے پیش نظر وفاقی وزیر اطلاعات فواد چوہدری جلد سندھ کا دورہ کریں گے۔
ذرائع کے مطابق وزیر اطلاعات ذوالفقار مرزا، امیر بخش بھٹو اور دیگر سیاسی شخصیات سے ملاقاتیں کریں گے، فواد چوہدری جے آئی ٹی رپورٹ پر سیاسی رہنماؤں کو اعتماد میں لیں گے۔
ذرائع کا کہنا ہے کہ فواد چوہدری وزیر اعظم کا خصوصی پیغام بھی سیاسی رہنماؤں کو پہنچائیں گے۔
خیال رہے کہ جے آئی ٹی میں نام آنے کے بعد پیپلز پارٹی کے شریک چیئرمین اور سابق صدر آصف علی زرداری، چیئرمین بلاول بھٹو، اور پیپلز پارٹی کی رہنما فریال تالپور سمیت 172 افراد کے نام ایگزٹ کنٹرول لسٹ میں ڈال دیے گئے ہیں۔
ای سی ایل میں شامل افراد میں وزیر اعلیٰ سندھ مراد علی شاہ کا نام بھی موجود ہے۔ پاکستان تحریک انصاف نے مراد علی شاہ سے بذات خود منی لانڈرنگ میں ملوث ہونے اور پی پی رہنماؤں کی سہولت کاری کرنے کے باعث ان سے مستعفی ہونے کا مطالبہ کیا ہے۔
