لاہور : وزیراطلاعات پنجاب فیاض الحسن چوہان نے کہا ہے کہ حمزہ شہباز اپنے والد کے غم میں ذہنی توازن کھو بیٹھے ہیں، آل پارٹیز کانفرنس فلاپ شو ہوگیا۔
ان خیالات کا اظہار انہوں نے لاہور میں میڈیا سے گفتگو کرتے ہوئے حمزہ شہباز کے بیان پر ردعمل میں کیا، وزیر اطلاعات پنجاب نے حمزہ شہباز کو آڑے ہاتھوں لیا۔
فیاض الحسن چوہان کا کہنا تھا کہ حمزہ شہباز کی نیب سے متعلق گفتگو پر افسوس ہے، حمزہ شہباز اپنے والد کے غم میں ذہنی توازن کھو بیٹھے ہیں، اداروں کے خلاف بے تکی اور بے ڈھنگی باتیں کررہے ہیں، حمزہ اور ان کے والد نے10سال تک پنجاب کے خزانے کو دونوں ہاتھوں سے لوٹا۔
انہوں نے کہا کہ حمزہ شہباز کو مخاطب کرتے ہوئے کہا کہ آپ کنٹینر پرچڑھیں یا کےٹو کی چوٹی پر آپ کی کرپشن اب نہیں چھپے گی۔ کاش باپ بیٹا پرائیوٹ لمیٹڈ اس وقت آزاد اداروں کی عزت کرتے جب یاجوج ماجوج کی طرح پنجاب کا خزانہ چاٹ رہے تھے، احتساب پر آل شریف کی چیخیں مریخ تک سنائی دے رہی ہیں۔
فیاض الحسن چوہان کا آل پارٹیز کانفرنس سے متعلق کہنا تھا کہ آل پاکستان لوٹ مار ایسوسی ایشن اکھٹی ہو گئی ہے، اور مولانا فضل الرحمان لوٹ مارایسو سی ایشن کے کنوینر بنے ہوئے ہیں، آل پارٹیز کانفرنس ایک فلاپ شو ہوگیا۔
