The news is by your side.

Advertisement

صوبے میں فرنٹ لائن ورکرز کو اضافی الاؤنس دیا جا رہا ہے: فیاض چوہان

لاہور: صوبائی وزیر اطلاعات فیاض الحسن چوہان کا کہنا ہے کہ وزیر اعلیٰ پنجاب کی ہدایت پر فرنٹ لائن ورکرز کو اضافی الاؤنس دیا جا رہا ہے، فرنٹ لائن ورکرز کے لیے 4 سے 8 ملین تک لائف انشورنس کا بھی اعلان کیا گیا ہے۔

تفصیلات کے مطابق صوبائی وزیر اطلاعات فیاض الحسن چوہان کا کہنا ہے کہ پنجاب کی تمام ڈویژنز میں گندم کی خریداری جاری ہے، حکومت نے 158 ارب سے زائد کی گندم خریدنے کا ہدف مقرر کیا ہے۔

فیاض چوہان کا کہنا تھا کہ 30 اپریل تک حکومت 45 لاکھ ٹن میں سے 32 فیصد ہدف پورا کر چکی ہے، 1400 فی من کے حساب سے کسانوں کو محنت کا پورا معاوضہ دیا جائے گا۔

انہوں نے کہا کہ کرونا وائرس کی وبا کے باعث ملکی معیشت شدید دباؤ کا شکار ہے، حکومت انتظامی امور اور عوام کو ریلیف کی پوری کوشش کر رہی ہے، پیٹرولیم مصنوعات کی قیمتوں میں کمی سے عوام کو ریلیف ملے گا۔

فیاض چوہان کا مزید کہنا تھا کہ وزیر اعلیٰ پنجاب کی ہدایت پر فرنٹ لائن ورکرز کو اضافی الاؤنس دیا جا رہا ہے، فرنٹ لائن ورکرز کے لیے 4 سے 8 ملین تک لائف انشورنس کا بھی اعلان کیا گیا ہے۔

اس سے قبل ایک موقع پر صوبائی وزیر اطلاعات نے کہا تھا کہ وزیر اعلیٰ پنجاب کرونا وائرس کے حوالے سے تمام آپشنز استعمال کر رہے ہیں، جدید دور کی مشکلات کا حل نت نئے طریقوں سے ہی ممکن ہے۔

انہوں نے کہا تھا کہ رائز پنجاب پروگرام اور کرونا ورکنگ گروپ کا قیام مثالیں ہیں، پروگرام بنیادی سہولتوں سے متعلق ہے، معاشی استحکام، رسک کمیونیکیشن اور رسک فنانسنگ رائز پنجاب کا حصہ ہیں۔

Comments

یہ بھی پڑھیں