لاہور : وزیراطلاعات پنجاب فیاض الحسن چوہان کا کہنا ہے کہ وزیرِ اعظم ملکی مفاد میں مشکل اورغیر مقبول فیصلے کرنے سے نہیں ہچکچاتے، پی ٹی آئی اقتدارمیں اپنی جیبیں نہیں، ملکی خزانہ بھرنے آئی ہے۔

تفصیلات کے مطابق وزیراطلاعات پنجاب فیاض الحسن چوہان نے اپنے بیان میں کہا کہ موجودہ حکومت اورالائیڈ پارٹیز فار کرپشن کےادوار میں فرق ہے، فرق بنیادی ترجیحات کا ہے۔

وزیراطلاعات پنجاب کا کہنا تھا کہ وزیرِ اعظم ملکی مفاد میں مشکل اورغیرمقبول فیصلےکرنےسےنہیں ہچکچاتے، پی ٹی آئی اقتدارمیں اپنی جیبیں نہیں، ملکی خزانہ بھرنے آئی ہے۔

فیاض الحسن چوہان نے مزید کہا کہ سیس ، کارکے اور آئی پی پی پر حکومتی اپروچ سب کے سامنے ہے، بروقت حکمت عملی سے حکومت نے تینوں کیسز سے 1244 ارب بچائے۔

ان کا کہنا تھا کہ گزشتہ حکومتوں نے کرپشن کے چکر میں قومی خزانے پر اربوں کا بوجھ ڈالا، صرف وہ میگا پراجیکٹس شروع کیے جن میں ذاتی مفاد تھا، قائد اعظم بزنس پارک شیخوپورہ اورریور راوی فرنٹ سٹی میں تاخیر کی گئی ، منصوبوں میں تاخیرکی وجہ ذاتی فائدہ نہ ہونا ہے۔