اسلام آباد : جمیعت علماء اسلام کے سربراہ مولانا فضل الرحمان نے پیپلزپارٹی، اے این پی اور ن لیگ کے ساتھ مشاورتی عمل ختم کرتے ہوئے علیحدہ اتحاد بنالیا ہے جس کے تحت رواں ماہ حکومت مخالف تحریک چلانے کا اعلان کیا گیا ہے۔
تفصیلات کے مطابق پیپلزپارٹی اور ن لیگ کی مفاہمتی پرواز کو دیکھتے ہوئے مولانا فضل الرحمان نے اپوزیشن اتحاد سے عملاً علیحدگی اختیار کرلی، جے یو آئی نے 3اپوزیشن جماعتوں سے سیاسی قطع تعلق کا حتمی فیصلہ کرلیا۔
اس حوالے سے ذرائع کا کہنا ہے کہ مولانا فضل الرحمان کی قیادت میں نیا سیاسی الائنس قائم کردیا گیا ہے،6جماعتی اپوزیشن الائنس نے ماہ فروری کے وسط سے حکومت کیخلاف ملک گیر تحریک شروع کرنے کا فیصلہ کیا ہے۔
ذرائع کے مطابق جمیعت علماء اسلام کے سربراہ نے پیپلزپارٹی، ن لیگ، اے این پی کے ساتھ مشاورتی عمل بھی ختم کردیا ہے، جس کے بعد مولانا فضل الرحمان نے6جماعتی اپوزیشن الائنس بنادیا ہے۔
جس میں جے یو آئی، نیشنل پارٹی ،جمعیت اہلحدیث، پختونخواہ ملی عوامی پارٹی شامل ہیں، اس کے علاوہ قومی وطن پارٹی اورجمعیت علمائے پاکستان بھی اس اتحاد کا حصہ ہیں۔
ذرائع کا کہنا ہے کہ 23فروری کو کراچی سے فضل الرحمان حکومت مخالف تحریک کا آغاز کریں گے، اسی روز کراچی میں 6اپوزیشن جماعتوں کامشترکہ جلسہ ہوگا جبکہ13مارچ کو مینار پاکستان لاہور میں جے یو آئی کے تحت جلسہ عام کا انعقاد کیا جائے گا۔
مولانا فضل الرحمان6فروری کو خصوصی دورے پر کراچی پہنچیں گے جہاں وہ علماء اور مدارس کے منتظمین سے اہم ملاقات کریں گے۔
