واشنگٹن: نیویارک سٹی میں سابق امریکی صدر بل کلنٹن کے گھر سے بم برآمد ہوا ہے، ایف بی آئی نے تحقیقات کا آغاز کردیا۔
غیرملکی خبررساں ادارے کے مطابق نیویارک سٹی میں سابق امریکی صدر بل کلنٹن کے گھر سے بم برآمد ہوا ہے، امریکی حکام کا کہنا ہے کہ سابق صدر بل کلنٹن کے گھر میں کسی نے مشتبہ پیکٹ بھیجا۔
امریکی میڈیا کے مطابق پیکٹ کی تلاشی پر اس میں سے دھماکا خیز ڈیوائس برآمد ہوئی ہے، بل کلنٹن کے گھر دھماکا خیز ڈیوائس کوریئر کے ذریعے بھیجی گئی تھی۔
ایف بی آئی کا کہنا ہے کہ چپاکووا نیویارک میں کلنٹن کے گھر سے مشتبہ پیکٹ کی تحقیقات جاری ہیں ابھی اس حوالے سے مزید کوئی تفصیلات نہیں بتا سکتے ہیں۔
نیویارک سٹی میں بل کلنٹن دو گھروں کے مالک ہیں ایک اولڈ ہاؤس لین اور دوسرا چپاکووا میں ہے جبکہ ان کے چپاکووا والے گھر میں مشتبہ پیکٹ کوریئر کے ذریعے بھیجا گیا تھا۔
قانون نافذ کرنے والے اداروں کا کہنا ہے کہ جو ڈیوائس کلنٹن کے گھر سے برآمد ہوئی ہے اسی طرح کی ایک ڈیوائس سوروز کے گھر سے بھی برآمد ہوئی تھی۔
امریکی میڈیا کے مطابق سابق صدر باراک اوباما کے دفتر میں بھی مشتبہ پیکٹ بھیجے جانے کی اطلاع ملی ہے تاہم امریکی سیکرٹ سروس کے مطابق اوباما کے دفتر میں بھیجا جانے والا مشتبہ پیکٹ روک لیا گیا ہے۔
واضح رہے کہ رواں سال جنوری میں سابق امریکی صدر بل کلنٹن اور ہیلری کلنٹن کے گھر آتشزدگی ہوئی تھی جسے فوراً بجھا دیا گیا تھا۔
آگ ان کے بیڈروم میں لگی تھی، پولیس کا کہنا تھا کہ کلنٹن فیملی کا یہ بیس سال پرانا گھر ہے، کلنٹن اور ہیلری نے یہ گھر 1999 میں 1.7 ملین ڈالر میں خریدا تھا۔
