تازہ ترین

ایف بی آر نے سوئی سدرن گیس کمپنی کے بینک اکاؤنٹ منجمد کر دیے

کراچی: ایف بی آر نے سوئی سدرن گیس کمپنی کے بینک اکاؤنٹس منجمد کر دیے۔

تفصیلات کے مطابق فیڈرل بورڈ آف ریونیو نے 23 ارب کے سیلز ٹیکس واجبات ادا نہ کرنے پر ایس ایس جی سی کے بینک اکاؤنٹس منجمد کر دیے۔

ایس ایس جی سی سے سیلز ٹیکس کی مد میں 312 ملین وصول کیے جا چکے ہیں، جب کہ 23 ارب روپے واجب الادا ہیں، اس رقم کی تصدیق اپیلیٹ کمشنر بھی کر چکے ہیں۔

ایف بی آر کا کہنا ہے کہ ایس ایس جی سی کے منجمد اکاؤنٹس سے واجب الادا رقم ریکور کی جائے گی، لارج ٹیکس پیئر آفس کو سیلز ٹیکس ایکٹ 1990 کی سیکشن 48 کے تحت یہ اختیار حاصل ہے۔

ایس ایس جی سی کی وضاحت

ایف بی آر کے ایشو پر سوئی سدرن گیس کمپنی کی وضاحت بھی آ گئی ہے، کمپنی کا کہنا ہے کہ غیر قانونی ریکوری نوٹس پر سندھ ہائیکورٹ میں ایک پٹیشن دائر ہے، عدالت نے وہ نوٹس قانونی معیار سے عاری ہونے پر معطل کر دیا تھا۔

ایس ایس جی سی ترجمان نے کہا کہ سندھ ہائی کورٹ نے اپیلٹ ٹریبونل کے سامنے پیروی کی ہدایت کی تھی، اپیلٹ ٹریبونل کے فیصلے کا انتظار کیے بغیر سیلز ٹیکس کی وصولی کا نوٹس جاری کیا گیا ہے۔

ایف بی آر کا پی آئی اے کیخلاف بڑا ایکشن

یاد رہے کہ 25 جنوری کو ایف بی آر نے ٹیکس پر فیڈریل ایکسائز ڈیوٹی ادا نہ کرنے پر قومی ایئرلائن پی آئی اے کے بینک اکاؤنٹس بھی منجمد کر دیے تھے، اور کہا تھا کہ اکاؤنٹس 4 ارب روپے ٹیکس ریکوری تک منجمد رہیں گے۔

بتایا گیا تھا کہ پی آئی اے نے 2 سال سے ٹکٹ پر وصولی پر ایف ای ڈی جمع نہیں کرایا، پی آئی اے نے 2 سال سے جمع فیڈریل ایکسائز کے 4.50 ارب روپےادا کرنے ہیں۔

Comments

- Advertisement -