اسلام آباد : ایف بی آر نے پہلے 8ماہ میں ریکارڈ 4382 ارب کی ٹیکس وصولیاں کرلیں ، گزشتہ سال اسی عرصے میں ٹیکس ریونیو 3394 ارب روپے تھا۔
تفصیلات کے مطابق ایف بی آر کو رواں مالی سال کے پہلے آٹھ ماہ میں ریکارڈ 4 ہزار382 ارب روپے کے ٹیکسز وصول ہوگئے گزشتہ مالی سال کے اسی عرصے کے مقابلے میں ٹیکسوں کی وصولی میں 247 ارب روپے یعنی 29.1 زائد رہی۔
ایف بی آر کا کہنا تھا کہ مارچ میں مجموعی طورپر 575 ارب روپے کی ٹیکسوں کی وصولی ہوئی جو گزشتہ سال مارچ کے مقابلے میں بیس اعشاریہ پانچ فیصد زائد ہے۔
فیڈرل بورڈ آف ریونیو کے مطابق مارچ 2021 کے 26 ارب 3 کروڑ روپے ریفنڈزکے مقابلے میں رواں سال مارچ میں 31 ارب 90 کروڑ روپے کے ریفنڈز بھی ادا کیے گئے، جو گزشتہ سال کے مقابلے میں اکیس اعشاریہ تین فیصد زائد ہیں۔
ایف بی آر نے بتایا کہ وزیراعظم عمران خان کی جانب سے عام آدمی کو ضروری اشیاء پر ٹیکس میں بڑے پیمانے پر ریلیف بھی دیا گیا جس کی وجہ سے ایف بی آر کو پٹرولیم مصنوعات پر سیلز ٹیکس کی مد میں پینتالیس ارب روپے کم حاصل ہوئے۔
اسی طرح کھاد، کیڑے مارادویات، ٹریکٹرز، گاڑیوں اور تیل و گھی پر چھوٹ سےاٹھارہ ارب روپے جبکہ ادویات کے شعبے میں زیرو ریٹنگ سے دس ارب روپے سیلزٹیکس کم ملا ۔
ایف بی آر نے ٹیکس ریلیف کے باوجود محصولات کی وصولیوں میں اضافہ خوش آئند قرار دیا ہے۔
