اسلام آباد : فیڈرل بورڈ آف ریوینیو نے رواں مالی سال میں ریکارڈ ٹیکس وصولی کی، ایف بی آر کی مالی سال20-2019میں ٹیکس وصولی3967ارب رہی۔
تفصیلات کے مطابق فیڈرل بورڈ آف ریونیو (آیف بی آر) نے مالی سال20-2019ء کا اپنا نظر ثانی شدہ ٹیکس ہدف کامیابی سے حاصل کرلیا ہے۔
اعلامیے کے مطابق ایف بی آر نے اپنے ریونیو اہداف حاصل کرلیے ہیں اور رواں مالی سال کے نظرثانی شدہ3907 ارب روپے کے ہدف کے مقابلے میں ایف بی آر کے جمع شدہ ٹیکسزکی رقم 3957 ارب روپے سے تجاوز کر چکی ہے۔
ایف بی آر ذرائع کے مطابق اس سال جمع شدہ ٹیکسز کی رقم ہدف سے 50 ارب زیادہ ہے، ایف بی آر کی مالی سال20-2019میں ٹیکس وصولی3967ارب رہی، نظر ثانی3907ارب کے مقابلے میں جمع ٹیکس3967ارب روپے رہا۔
ایف بی آر کو نظر ثانی سے60ارب روپے کی زائد وصولیاں ہوئیں، کورونا وائرس اور اقتصادی مشکلات کے باوجود ٹیکس وصولیوں میں3.9فیصد اضافہ ہوا۔
ذرائع کا کہنا ہے کہ گزشتہ جون کی472ارب کی وصولیوں کے مقابلے میں اس بار415 ارب جمع کیے، ایف بی آر نے پہلی بار مجموعی ریونیو کی مد میں4کھرب کا ہدف حاصل کیا، انکم ٹیکس کی مد میں 1484ارب کی وصولیاں جبکہ سیلز ٹیکس کی مد میں1597ارب کی ٹیکس وصولیاں ممکن ہوئیں۔
ذرائع کے مطابق فیڈرل ایکسائز ڈیوٹی کی مد میں255ارب سے زائد کی وصولیاں ہوئیں، کسٹمز وصولیوں کا حجم618ارب سے کچھ زیادہ رہا، ری فنڈ کی مد میں127ارب سے زائد کا اجرا ممکن ہوا۔
