ریاض: سعودی عرب نے امسال فریضہ مقدسہ کی ادائیگی کے لیے خصوصی طور پر حج اسمارٹ کارڈ(شعائر) کا اجرا کیا ہے اور اب اس کی خصوصیات بھی بتا دیں۔
عرب میڈیا کی رپورٹ کے مطابق مشاعر مقدسہ (منیٰ، عرفات و مزدلفہ) میں خود کار آلات نصب کیے گئے ہیں جہاں حج اسمارٹ کارڈ کی ریڈنگ ہوگی اور مطلوبہ سہولیات فراہم کی جائیں گی۔ ‘شعائر’ کئی خوبیوں اور خصوصیات سے آراستہ ہے، اس میں حجاج کی نجی اور رہائش سے متعلق معلومات بھی درج ہیں۔
اسمارٹ کارڈ کے ذریعے حجاج کرام منیٰ، مزدلفہ یا عرفات میں اپنے رہائشی کیمپ کا پتا لگا سکیں گے، کارڈ ہونے کی صورت میں کسی مقام پر روک ٹوک نہیں ہوگی۔
التحول الرقمي في المملكة واقع وليس خيال، في #حج1442 سيكون هناك "بطاقة الشعائر الذكية" والتى تمثل نقلة نوعية في منظومة الاعمال لتسهيلات متعددة في بطاقة واحدة.
نتشرف بخدمتكم … pic.twitter.com/c65achxft4— عبدالفتاح مشاط (@asmashat) July 12, 2021
اسی ضمن میں سیکریٹری حج و عمرہ ڈاکٹر عمرو المداح نے بتایا کہ حج اسمارٹ کارڈ حجاج کو ہر طرح کی سہولت فراہم کرے گا، انہیں کہاں جانا ہے، کہاں رکنا ہے، سفر کا وقت کب ہے، رہائش کہاں اختیار کرنی ہے سمیت کھانے پینے سے لے کر کسی بھی وارننگ سے بھی حجاج آگاہ رہ سکیں گے۔
ان کا کہنا تھا کہ حج کا سفر کیسا رہا، کیا کچھ اچھا رہا کیا اور برا لگا، یہ اور ان جیسے دیگر سوالات بھی حاجی اپنے سفر کے اختتام پر اسمارٹ کارڈ کے تحت متعلقہ حکام تک پہنچا سکتا ہے۔
خیال رہے کہ حج کے لیے جاری کارڈ میں حاجی کی صحت معلومات، قافلوں کے چارٹ اور اپنا حج پروگرام بھی درج کرسکے گا، جبکہ اسمارٹ گیٹ کے ذریعے داخلہ بھی اسی کارڈ سے ملے گا۔
