اسلام آباد: وزیراعظم عمران خان کی زیرصدارت ہونے والے وفاقی کابینہ کے خصوصی اجلاس میں منی بجٹ سے متعلق اہم ترین فیصلہ کرلیا گیا ہے۔
وفاقی وزیر اطلاعات فواد چوہدری کی جانب سے سماجی رابطے کی ویب سائٹ ٹوئٹر پر جاری بیان میں کہا گیا کہ وزیراعظم عمران خان کی زیرصدارت وفاقی کابینہ کا خصوصی اجلاس ہوا، اجلاس میں وزیر خزانہ شوکت ترین نے بل کا مسودہ کابینہ میں پیش کیا، باہمی مشاورت کے بعد وفاقی کابینہ نے فنانس ترمیمی بل 2021 کی منظوری دےدی ہے۔
فوادچوہدری نے اپنے ٹوئٹ میں کہا کہ منی بجٹ اب قومی اسمبلی میں پیش ہوگا۔
کابینہ نے فنانس بل کی منظوری دے دی ہے، اب یہ بل قومی اسمبلی کے اجلاس میں پیش کیا جائیگا۔ https://t.co/S5skxZfxQf
— Ch Fawad Hussain (@fawadchaudhry) December 30, 2021
ذرائع کے مطابق منی بجٹ میں ایک ہزار700 سے زائد اشیا پر ٹیکس لگے گا۔ 350 ارب روپے کی ٹیکس چھوٹ ختم ہوگی ۔
واضح رہے کہ وزیر اعظم نے تحریک انصاف کی سی ای سی کا اجلاس بھی آج طلب کیا ہے، سی ای سی کا اجلاس سہ پہر3بجکر15منٹ پر پارلیمنٹ ہاؤس میں ہوگا۔
وزیراعظم پارٹی امور، سیاسی اور معاشی صورت حال پربات کریں گے، سینٹرل ایگزیکٹو کمیٹی کو بھی فنانس ترمیمی بل پر اعتماد میں لیا جائے گا، تشکیل پانےوالےنئے21رکنی تنظیمی ڈھانچےکو ہی سی ای سی کا نام دیا گیا ہے۔