اسلام آباد : وفاقی کابینہ نے نامزد آرمی چیف جنرل عاصم منیرکی ریٹائرمنٹ منجمد کردی، جس کے تحت جنرل سیدعاصم منیر 27 نومبر کے بعد بھی ریٹائرڈ تصور نہیں ہوں گے۔
تفصیلات کے مطابق وفاقی کابینہ نے نامزد آرمی چیف جنرل عاصم منیرکی ریٹائرمنٹ منجمد کردی ، ذرائع کا کہنا ہے کہ جنرل سیدعاصم منیرکی ریٹائرمنٹ موجودہ قوانین کے تحت منجمد کی گئی۔
ذرائع نے بتایا کہ جنرل سید عاصم منیر27 نومبر کے بعد بھی ریٹائرڈ تصور نہیں ہوں گے۔
یاد رہے وزیراعظم پاکستان نے آئینی اختیارات استعمال کرتےہوئے جنرل ساحرشمشاد مرزا کوچئیرمین جوائنٹ چیفس آف اسٹاف اور جنرل سید عاصم منیرکو چیف آف آرمی اسٹاف مقرر کرنےکا فیصلہ کیا۔ جس کی سمری صدر پاکستان کو ارسال کردی گئی ہے۔
خیال رہے پاکستان کی عسکری تاریخ میں جنرل سید عاصم منیر پہلے آرمی چیف ہوں گے، جو دوانٹیلی جنس ایجنسیوں آئی ایس آئی اور ملٹری انٹیلی جنس کی سربراہی کرچکے ہیں۔
وہ پہلے کوارٹر ماسٹر جنرل ہوں گے جنہیں آرمی چیف مقرر کیا گیا، یہی نہیں حافظ سید عاصم منیر پہلے آرمی چیف ہوں گے جو پاکستان ملٹری اکیڈمی لانگ کورس سے نہیں بلکہ اوٹی ایس کمیشنڈ آفیسر ہوں گے۔
