اسلام آباد : وفاقی کابینہ نے 20 ادویات کی قیمتوں کی کمی کی منظوری دے دی، جس میں بلڈ پریشر، کینسر ،آنکھوں کی بیماریوں میں استعمال ہونے والی ادویات شامل ہیں۔
تفصیلات کے مطابق وفاقی وزیر صحت کی سفارش پر حکومت نے ادویات کی قیمتوں میں کمی کردی گئی۔
ترجمان وزارت صحت نے بتایا کہ کابینہ نے 20 ادویات کی قیمتوں کی کمی کی منظوری دے دی، زیادہ تر ادویات کی قیمتوں میں کمی 30 فیصد ہوئی ہے۔
ترجمان کا کہنا تھا کہ ادویات کی قیمتوں میں کمی لوگوں کو ریلیف دینے کیلئے ایک اور قدم ہے۔
وفاقی وزیر عبدالقادر پٹیل نے بتایا کہ بلڈ پریشر، کینسر ،آنکھوں کی بیماریوں میں استعمال ہونے والی ادویات کی قیمتوں میں کمی کی گئی جبکہ 54نئی ادویات کی قیمتیں فکس کرنےکی بھی منظوری دی گئی ہے۔
عبدالقادر پٹیل کا کہنا تھا کہ یہ نئی ادویات کینسراور مختلف بیماریوں میں استعمال ہوں گی، حکومت ریلیف دینے کیلئے مؤثر اقدامات کو یقینی بنانے کیلئے پر عزم ہے۔
وفاقی وزیر نے مزید کہا کہ پی ٹی آئی حکومت نے ادویات کی قیمتوں میں 700فی صد تک اضافہ کیاتھا، ڈریپ میں میرٹ ،شفافیت کے نظام کو فروغ دینے کیلئے پر عزم ہیں۔
ان کا کہنا تھا کہ عوام کی فلاح وبہبود کیلئے معیاری ادویات کی بلاتعطل فراہمی یقینی بنانا ترجیح ہے۔
