اسلام آباد: وفاقی حکومت نے سندھ میں ٹائیگر فورس کو ہر حال میں متحرک کرنے کا فیصلہ کر لیا ہے۔
اے آر وائی نیوز کے مطابق کرونا وائرس کی روک تھام کے سلسلے میں قائم کی گئی ٹائیگر فورس کے معاملے پر سندھ اور وفاق پھر آمنے سامنے آ گئے ہیں، وفاقی حکومت نے سندھ میں ٹائیگر فورس کو ہر حال میں متحرک کرنے کا فیصلہ کیا ہے۔
ذرایع کا کہنا ہے کہ سندھ میں ٹائیگر فورس کا انتظام گورنر کو سونپے جانے کا امکان ہے، صوبائی حکومت کی بجائے یہ ٹاسک گورنر سندھ عمران اسماعیل کو سونپے جانے پر غور کیا جا رہا ہے۔
وزیر اعظم عمران خان نے بھی قریبی رہنماؤں سے اس سلسلے میں مشاورت کر لی ہے، حتمی اعلان سے قبل سیکریٹری سندھ کو مراسلہ بھیجنے کا فیصلہ کیا گیا ہے، وفاقی حکومت نے مراسلہ تیار کر لیا، آج ارسال کیا جائے گا۔
عثمان ڈار کا کرونا ریلیف ٹائیگر فورس سے متعلق بڑا اعلان
ذرایع کے مطابق وفاقی حکومت سیکریٹری سندھ سے واضح جواب مانگے گی، سندھ حکومت کے انکار پر گورنر سندھ کو 2 روز تک ذمہ داری سونپ دی جائے گی۔
واضح رہے کہ کرونا ریلیف ٹائیگر فورس میں 2 ہفتوں کے دوران 10 لاکھ رضاکاروں نے رجسٹریشن کرائی، فورس کے نوجوان احساس سینٹرز، مساجد، یوٹیلٹی اسٹورز پر کام کریں گے۔ گزشتہ روز معاون خصوصی عثمان ڈار نے اہم اعلان کرتے ہوئے کہا کہ کرونا ریلیف ٹائیگر فورس وبا کے بعد گرین فورس میں بدل جائے گی اور ملکی معیشت میں اہم کردار ادا کرے گی۔
