اسلام آباد: وفاقی حکومت نے نیب قانون میں بڑی تبدیلی کا فیصلہ کر لیا، نیب عدالتوں کو کرپشن کے ملزمان کی ضمانت کا اختیار دیا جائے گا۔
تفصیلات کے مطابق وزارت قانون نے نئے نیب آرڈیننس کی تیاری شروع کردی ہے اور نئے آرڈیننس میں چیئرمین نیب کا وارنٹ گرفتاری کا اختیار بھی ختم کرنے پر غور کیا جارہا ہے۔
ذرائع کا کہنا ہے کہ رضاکارانہ رقم کی واپسی پر نااہلی کی سزا تجویز کی جائے گی، رضاکارانہ رقم واپس کرنے والا پانچ سال کیلئے عوامی عہدے کے لیے نااہل ہوگا۔
ذرائع کے مطابق وزیر قانون فروغ نسیم نے اس حوالے سے وزیر اعظم عمران خان کو ابتدائی خدوخال سے آگاہ کر دیا اور وزیراعظم کو نیب آرڈیننس پر سیاسی جماعتوں کو اعتماد میں لینے کا مشورہ دیا ہے۔
وزیر اعظم نے سیاسی جماعتوں کو اعتماد میں لینے کے لیے اسپیکر کی سربراہی میں کمیٹی تشکیل دی ہے، کمیٹی سیاسی جماعتوں اور اسٹیک ہولڈرز کو نیب آرڈیننس پر اعتماد میں لے گی، پرویز خٹک اور اسد عمر بھی حکومتی کمیٹی کا حصہ ہیں۔
