اسلام آباد : وفاقی حکومت نے اپوزیشن کی آل پارٹیز کانفرنس پر بھرپور رد عمل دینے کا فیصلہ کرلیا ، اہم حکومتی رہنماکچھ دیر بعد پریس کانفرنس کریں گے۔
تفصیلات کے مطابق وزیر اعظم عمران خان کی زیرصدارت حکومتی ترجمانوں کااجلاس ہوا ، جس میں اپوزیشن کی اے پی سی پر حکومتی حکمت عملی اوربیانیہ پرمشاورت کی گئی۔
وفاقی حکومت نے اپوزیشن کی اے پی سی پر بھرپور رد عمل دینے کا فیصلہ کیا ، اہم حکومتی رہنماکچھ دیر بعد پریس کانفرنس کریں گے، شبلی فراز، اسد عمر ،فواد چوہدری اپوزیشن کے بیانیےپرحکومتی موقف دیں گے۔
یاد رہے اپوزیشن کی آل پارٹیز کانفرنس نے وزیر اعظم عمران خان سے استعفے کا مطالبہ کرتے ہوئے کہا تھا کہ ملک میں شفاف، آزادانہ اور غیر جانب دارانہ انتخابات کا انعقاد یقینی بنایا جائے۔
کانفرنس کے بعد مولانا فضل الرحمان نے پریس کانفرنس میں اے پی سی کی قرارداد پیش کی تھی، قرارداد میں کہا گیا تھا کہ موجودہ حکومت کو الیکشن میں دھاندلی سے عوام پر مسلط کیا گیا، اس لیے اے پی سی وزیر اعظم کے استعفے کا مطالبہ کرتی ہے، متحدہ اپوزیشن ملک گیر احتجاج کا بھی اعلان کرتی ہے، اکتوبر، نومبر میں بڑے شہروں میں مشترکہ جلسے کیے جائیں گے، دسمبر میں دوسرے مرحلے میں صوبائی دارالحکومتوں میں ریلیاں نکالی جائیں گی، جب کہ جنوری 2021 میں اسلام آباد کی طرف فیصلہ کن لانگ مارچ ہوگا۔
