اسلام آباد : وفاقی حکومت نے الیکشن ایکٹ 2017 میں مزید ترمیم کافیصلہ کرلیا، سیکشن57میں ترمیم کے بعد انتخابات کیلئے پولنگ ڈے تجویز کا اختیار الیکشن کمیشن کا ہوگا۔
تفصیلات کے مطابق حکومت نے قانون سازی کی ٹھان لی کہ انتخابات کی تاریخ صرف الیکشن کمیشن دے، اس سلسلے میں وفاقی حکومت نےالیکشن ایکٹ 2017 میں مزید ترمیم کا فیصلہ کرلیا۔
ذرائع نے بتایا کہ الیکشن ایکٹ کے سیکشن 57 اور 58 میں ترامیم پر کام شروع ہوگیا ہے ، سیکشن 57 میں ترمیم کے بعد انتخابات کیلئے پولنگ ڈے تجویز کا اختیار الیکشن کمیشن کا ہوگا۔
ذرائع کا کہنا تھا کہ سیکشن 58 کے تحت انتخابی شیڈول کے اجرا کا اختیار بھی الیکشن کمیشن کے پاس ہوگا، اس کے تحت شفاف انتخابات کیلئے الیکشن کمیشن کا کردار واضح کیا جائے گا۔
ذرائع نے مزید بتایا کہ سیکشن 58 میں ترمیم سےالیکشن کمیشن کا کردار مضبوط ہوگا اور کوئی مداخلت نہیں کر سکے گا، الیکشن ایکٹ میں ترمیم سے متعلق مسودہ منگل کو پارلیمانی امور کے حوالے کیے جانے کا امکان ہے۔