وفاقی وزیراطلاعات عطا تارڑ نے پاک افغان بین الاقوامی سرحد سے متعلق گمراہ کن بیانیے پر سخت ردعمل دیتے ہوئے بیان جاری کیا ہے۔
تفصیلات کے مطابق عطا تارڑ نے پاک افغان بین الاقوامی سرحد کے حوالے سے گمراہ کن پروپیگنڈہ یکسر مسترد کردیا، وفاقی وزیراطلاعات نے سوشل میڈیا پلیٹ فارم ایکس پر جاری بیان میں کہا کہ بین الاقوامی سرحد کو بین الاقوامی سرحد ہی سمجھنا چاہیے۔
وفاقی وزیراطلاعات عطاتارڑ نے کہا کہ مغربی اور مشرقی پنجاب کے درمیان انٹرنیشنل بارڈر ہے کسی کو مسئلہ نہیں، ڈیورنڈ لائن نامی کوئی چیز نہیں، ان کو یہ بات اچھی طرح سمجھ لینی چاہیے۔
انھوں نے کہا کہ سہیل آفریدی ان چندلوگوں میں سے ہیں جن کو فی الحال یہ سمجھ نہیں آرہی، انھیں بین الاقوامی سرحد کی بات سمجھ نہیں آتی تو ہمیں سمجھانے کے دوسرے طریقے آتے ہیں۔
اس سے قبل وزیراطلاعات عطا تارڑ نے سابق وزیر اعظم اور ان کی اہلیہ بشریٰ بی بی کے خلاف توشہ خانہ ٹو کیس کے فیصلے پر ردعمل دیتے ہوئے کہا تھا کہ یہ انصاف پر مبنی فیصلہ ہے، بانی پی ٹی آئی اور بشریٰ بی بی نے اپنے گھر میں کاروبار بنایا ہوا تھا۔
وفاقی وزیر نے کہا کہ قومی خزانے کو کروڑوں روپے کا نقصان پہنچایا گیا، اصل قیمت سے کم اونے پونے پیسے قومی خزانے میں جمع کرائے گئے، یہ احتساب کی بات کرتے ہیں اور ان پر کرپشن کے کیسز سامنے آتے ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں