اسلام آباد: گزشتہ روز وفاقی وزیر مذہبی امور مفتی عبد الشکور کی گاڑی کو حادثے کی ابتدائی تحقیقاتی رپورٹ تیار کرلی گئی، وفاقی وزیر کی گاڑی سے ٹکرانے والی گاڑی کی رفتار 110 کلو میٹر تھی۔
تفصیلات کے مطابق وفاقی وزیر مذہبی امور مفتی عبد الشکور کی گاڑی کو حادثے کی ابتدائی تحقیقاتی رپورٹ پولیس نے تیار کرلی۔
رپورٹ میں کہا گیا ہے کہ گاڑی پولٹری بزنس سے وابستہ شخصیت کے اسکواڈ میں شامل تھی، مفتی عبد الشکور کی گاڑی سے ٹکرانے والی گاڑی کی رفتار 110 کلو میٹر تھی جبکہ حادثے کے وقت مفتی عبد الشکور کی گاڑی کی رفتار 30 کلو میٹر تھی۔
رپورٹ کے مطابق شاہراہ دستور پر جائے حادثہ کے مقام پر گاڑی کی حد رفتار 60 کلو میٹر فی گھنٹہ مقرر ہے، شاہراہ دستور پر جائے حادثہ کے مقام پر اس وقت ٹریفک سگنلز فری کیے ہوئے تھے۔
رپورٹ میں کہا گیا ہے کہ ٹکر مارنے والی گاڑی میں کوئی تکنیکی مسئلہ نہیں تھا، حادثے کے باعث مفتی عبد الشکور کی گاڑی کا ٹائر اور ایکسل الگ ہو گیا تھا۔
خیال رہے کہ گزشتہ روز مولانا عبد الشکور اپنی گاڑی میں نجی ہوٹل سے سیکریٹریٹ چوک کی طرف جاتے ہوئے خوفناک حادثے کا شکار ہوگئے تھے۔
وفاقی وزیر کو حادثے کے فوراً بعد پولی کلینک اسپتال منتقل کیا گیا تھا لیکن وہ جانبر نہ ہو سکے۔
