کراچی: وفاق اور سندھ میں دوریاں کم ہونے لگیں، سندھ حکومت نے وزیراعظم کی قائم کردہ ٹائیگرفورس کو راشن تقسیم میں شامل کرنے کا فیصلہ کرلیا۔
تفصیلات کے مطابق کرونا وائرس کی وجہ سے سندھ حکومت اور وفاق درمیان پیدا ہونے والی دوریاں کم ہونے لگیں، سندھ حکومت نے وزیراعظم کی قائم کردہ ٹائیگر فورس کو راشن تقسیم میں شامل کرنے کا فیصلہ کرلیا۔
نمائندہ اے آر وائی نیوز کے مطابق چیف سیکریٹری سندھ کے احکامات پر صوبے بھر کے کمشنرز کو خط لکھ دیا ہے، مراسلے کے مطابق سندھ بھر میں راشن کی بہتر تقسیم کے لیے ٹائیگر فورس کی خدمات بھی لی جائیں۔
چیف سیکریٹری سندھ کے احکامات پر محکمہ سروسز ایڈمنسٹریشن نے مراسلہ جاری کردیا، وزیراعظم نے ملک بھر میں راشن تقسیم کے لیے رضاکاروں کی ٹائیگرفورس قائم کرنے کا اعلان کیا تھا۔
واضح رہے کہ کرونا وائرس لاک ڈاؤن کے سبب سندھ حکومت کی جانب سے غریب طبقے میں راشن تقسیم کرنے کا اعلان کیا گیا تھا لیکن راشن تقسیم کو لے کر سندھ حکومت کے خلاف مختلف شہروں میں احتجاج کیا گیا تھا۔
احتجاجی مظاہرین کا کہنا تھا کہ راشن من پسند افراد کو فراہم کیا جارہا ہے غریب افراد کو کوئی راشن نہیں دیا جارہا، آج کراچی کے علاقے لائنز ایریا میں بھی مظاہرین راشن تقسیم کے معاملے پر احتجاج کیا گیا تھا اور ریگل جانے والی صدر بلاک کردی تھی۔
یاد رہے کہ کرونا وائرس کی وجہ سے لاک ڈاؤن کی وجہ سے سب سے زیادہ غریب طبقہ متاثر ہورہا ہے ، کرونا کے پھیلاؤ کو روکنے کے لیے لاک ڈاؤن مزید 30 اپریل تک جاری رہے گا۔
