اسلام آباد : خاتون افسر کائنات اظہر خان کو چیف ٹریفک افسر اسلام آباد تعینات کردیا گیا، وہ اس سے قبل کئی اہم عہدوں پر فرائض سرانجام دے چکی ہیں۔
تفصیلات کے مطابق وفاق کی سطح پر اہم پولیس تعیناتیوں کے تحت خاتون پولیس افسر کائنات اظہر خان کو چیف ٹریفک افسر اسلام آباد تعینات کر دیا گیا ہے اور اس کا باقاعدہ نوٹیفیکیشن بھی جاری کردیا گیا۔
نوٹیفیکیشن نے کہا کہ کائنات اظہر خان کو سی ٹی او اسلام آباد مقرر کرنے کے ساتھ ساتھ ایس ایس پی آپریشنز سیف سٹی کا ایڈیشنل چارج بھی سونپ دیا گیا ہے۔
اسلام آباد میں خدمات انجام دینے والے ایس ایس پی محمد سرفراز ورک کا تبادلہ کر دیا گیا ہے اور ان کی خدمات پنجاب حکومت کے سپرد کر دی گئی ہیں۔
نئی چیف ٹریفک افسر کائنات اظہر خان پولیس سروس میں وسیع تجربہ رکھتی ہیں اور اس سے قبل کئی اہم عہدوں پر فرائض سرانجام دے چکی ہیں۔
وہ ملتان میں بطور چیف ٹریفک افسر اور ایس پی کینٹ کے طور پر بہترین خدمات انجام دے رہی تھیں، اس سے قبل وہ راولپنڈی میں بطور ایس ڈی پی او (SDPO) سول لائنز اور کینٹ بھی تعینات رہ چکی ہیں۔
وفاقی دارالحکومت میں ان کی تعیناتی کو ٹریفک کے نظام کو جدید خطوط پر استوار کرنے اور سیف سٹی پروجیکٹ کو مزید فعال بنانے کے لیے ایک اہم قدم قرار دیا جا رہا ہے۔
