لاہور: وفاقی تحقیقاتی ایجنسی (ایف آئی اے) نے سابق وزیر اعلیٰ پنجاب شہباز شریف کے خلاف جعلی اکاؤنٹس کیس میں ایم سی بی کے نائب صدر عاصم سوری کو گرفتار کرلیا جبکہ گروپ ہیڈ اظہر محمود کی گرفتاری کے لیے بھی ٹیمیں روانہ کردی گئیں۔
تفصیلات کے مطابق وفاقی تحقیقاتی ایجنسی (ایف آئی اے) نے سابق وزیر اعلیٰ پنجاب شہباز شریف کے خلاف جعلی اکاؤنٹس کیس میں اہم کارروائی کرتے ہوئے ایم سی بی کے نائب صدر اور ہیڈ آف کمپلائنس عاصم سوری کو گرفتار کرلیا۔
ذرائع ایف آئی اے کا کہنا ہے کہ ایم سی بی کے گروپ ہیڈ اظہر محمود کی گرفتاری کے لیے بھی ٹیمیں روانہ کردی گئی ہیں۔
ذرائع کے مطابق اظہر محمود ایف آئی اے کے ایڈیشنل ڈائریکٹر کے عہدے سے ریٹائرڈ ہوئے تھے، اظہر محمود ایف آئی اے کی اندرونی باتیں نکال کر میاں منشا کو دیتے تھے۔
ذرائع کا مزید کہنا ہے کہ اظہر محمود میاں منشا کے خاص آدمی ہیں۔
یاد رہے کہ سابق وزیر اعلیٰ پنجاب شہباز شریف اور ان کے صاحبزادے حمزہ شہباز رمضان شوگر ملز اور العربیہ شوگر ملز کے ذریعے 25 ارب روپے کی منی لانڈرنگ کے مقدمے کا سامنا کر رہے ہیں، دونوں اس وقت ضمانت پر ہیں۔
ایف آئی اے کی تحقیق کے مطابق شہباز شریف اور ان کے صاحبزادوں نے چپڑاسی، کلرک، کیشیئرز اور مینیجرز کے نام پرمنی لانڈرنگ کی، منی لانڈرنگ میں شوگر ملز ہی کے 20 ملازمین کے بینک اکاؤنٹس استعمال کیے گئے۔
ذرائع کے مطابق نقد رقوم سلمان شہباز کے دفتر پہنچائی جاتی تھیں جس کے بعد سلمان شہباز کے دفتر سے تمام رقم ہنڈی اور حوالے کے ذریعے بیرون ملک بھیج دی جاتی تھی۔
