اسلام آباد : فیڈرل انوسٹی گیشن ایجنسی (ایف آئی اے) نے خیبر پختوخوا میں حوالہ ہنڈی میں ملوث 7ملزمان کے قبضے سے لاکھوں روپے مالیت کی رسیدیں برآمد کرکے گرفتار کرلیا۔
تفصیلات کے مطابق خیبرپختونخوا میں حوالہ ہنڈی کے غیرقانونی کاروبار کرنے والوں کے خلاف ایف آئی اے نے کریک ڈاؤن کرتے ہوئے گھیر اتنگ کردیا۔
ایف آئی اے کے عملے نے خیبرپختونخوا زون میں سات مقامات پر کامیاب چھاپے مارے، چھاپہ مار کارروائیوں میں 7ملزمان کو گرفتارکرکے ان کیخلاف مقدمات درج کرلیے گئے۔
ذرائع کے مطابق پشاور میں3چھاپوں کے دوران مجموعی طور پر 88لاکھ55ہزار روپے اور 200ڈالر برآمد ہوئے جبکہ مردان میں چھاپے کےدوران31لاکھ روپے اور ہنڈی کی رسیدیں برآمد کی گئیں۔
اس کے علاوہ ایبٹ آباد میں چھاپے کے دوران6لاکھ15ہزار روپے اور رسیدیں برآمد اور بنوں میں کارروائی کے دوران8لاکھ35ہزار روپےاور ہنڈی کی رسیدیں برآمد کی گئیں ہیں۔
ایک اور کارروائی میں ایف آئی اے کے عملے نے ڈیرہ اسماعیل خان میں چھاپے کے دوران 7لاکھ32ہزار روپے اورہنڈی کی رسیدیں برآمد کی ہیں۔
