اسلام آباد : ایف آئی اے نے ڈھوک تونسہ سے اے ٹی ایم سے رقوم چوری کرنے والے گینگ کا ممبر پکڑلیا جس نے بھارتی ہیکرز سے رابطوں کا اعتراف کرلیا ہے۔
تفصیلات کے مطابق اے ٹی ایم سے پیسے چوری کرنے میں بین الاقوامی گینگ ملوث ہے، یہ گینگ لوکل نہیں بلکہ انٹرنیشنل گروہ ہے۔
اس حوالے سے ایف آئی اے کے ڈائریکٹر سائبر کرائم شکیل درانی نے پریس کانفرنس کرتے ہوئے بتایا کہ ایف آئی اے نے ڈھوک تونسہ سے ثاقب اللہ نامی ایک ملزم گرفتار کیا ہے، ملزم نے دوران تفتیش بھارتی ہیکروں سے براہ راست رابطوں کا اعتراف بھی کیا ہے۔
ڈائریکٹر ایف آئی اے کا مزید کہنا تھا کہ ملزم بین الاقوامی سائبر گینگ سے تعلق رکھتا ہے، اس کے علاوہ ملزم کے کینیڈین، امریکی اور نائیجرین ہیکرز سے بھی رابطے تھے۔
مذکورہ گینگ جعلی کریڈٹ کارڈ سمیت خواتین کی ویڈیو بناکر انہیں بلیک میل کرنے میں بھی ملوث ہے، انہوں نے بتایا کہ ملزم ثاقب اللہ راولپنڈی کا رہائشی ہے جس کو ایف آئی اے سائبر کرائم سیل نے ڈھوک تونسہ سے حراست میں لیا ہے۔
مزید پڑھیں: ہیکرز نے اے ٹی ایم صارفین کے لاکھوں روپے لوٹ لیے
یاد رہے کہ اس سے قبل ایف آئی اے سائبرکرائم سیل نے گزشتہ دنوں دو چینی باشندوں کو بھی گرفتار کیا تھا، گرفتار چینی شہریوں سے اسکمنگ ڈیوائس بھی برآمد ہوئی تھی۔
مزید پڑھیں: ملک میں متعدد اے ٹی ایم ہیک ہوگئے، اسٹیٹ بینک
ایف آئی اے حکام کا کہنا ہے کہ اےٹی ایم کارڈز کے فراڈ میں چینی ہیکرز انتہائی شاطر ہیں، سائبر کرائم سرکل نے گزشتہ دوسال میں دو گروہوں کو پکڑا تھا۔
