اسلام آباد (16 نومبر 2025): فیلڈ مارشل سید عاصم منیر نے کہا ہے کہ جنگ مسلط کرنے والوں کو اسی طرح جواب دیں گے جیسا مئی میں دیا تھا۔
اے آر وائی نیوز کے مطابق فیلڈ مارشل جنرل سید عاصم منیر نے ایوان صدر میں تقریب کے دوران گفتگو کرتے ہوئے کہا ہے کہ پاکستان ایک امن پسند ملک ہے تاہم جنگ مسلط کی گئی تو اسی طرح جواب دیں گے جیسا مئی میں دیا گیا تھا۔
سید عاصم منیر نے کہا کہ اللہ کا خاص کرم ہے کہ پاکستان نے اپنے دشمن کو دھول چٹائی۔ بھارت کیخلاف جنگ میں اللہ نے پاکستان کو سربلند کیا اور بھارت کیخلاف جنگ میں جذبہ ایمانی کی وجہ سے فتح ملی۔
فیلڈ مارشل نے اپنی گفتگو میں قرآنی آیت کا حوالہ دیتے ہوئے کہا کہ اللہ کی مدد شامل ہو، تب ہی فتح اور کامیابی ممکن ہوتی ہے۔ مسلمانوں کا جذبہ ایمانی ہے ان کی سب سے بڑی قوت ہے۔
ان کا مزید کہنا تھا کہ دشمن کے خلاف تاریخی فتح دلانے پر ہم اللہ تعالیٰ کے شکر گزار ہیں۔
