کابل: افغانستان سے غیر ملکی افواج کا انخلا جاری ہے، ایسے میں افغان فورسز نے طالبان کے خلاف گرینڈ آپریشن جاری رکھا ہوا ہے، آپریشن میں ابھی تک متعدد طالبان مارے جاچکے ہیں۔
افغان وزرات دفاع کی جانب سے جاری بیان کے مطابق افغان فورسز نے کابل، ہلمند، قندھار، لوگر سمیت پندرہ صوبوں میں گرینڈ آپریشن کیا، آپریشن گذشتہ چوبیس گھنٹوں کے دوران کئے گئے، اس دوران 234 طالبان کو ہلاک کیا گیا جبکہ آپریشن کے دوران 103 طالبان زخمی بھی ہوئے۔
افغان وزارت دفاع کی جانب سے جاری بیان میں بتایا گیا کہ ہیرات میں طالبان کے خفیہ ٹھکانوں پر فضائی حملے کئے گئے، حملوں میں 50 کے قریب طالبان مارے گئے اسی طرح صوبے ثمن گر میں بھی فضائی آپریشن کے دوران 14 طالبان کو ہلاک کیا گیا۔
واضح رہے کہ افغانستان سے امریکی اور اتحادی افواج کا انخلا جاری ہے، جس کے باعث افغانستان میں سیکیورٹی فورسز اور طالبان کے درمیان جھڑپوں میں تیزی آگئی ہے۔
یہ بھی پڑھیں: امریکی افواج کا انخلا: افغان اہلکاروں کو ہتھیار ڈالنے پر قائل کرنے والے درجنوں عمائدین گرفتار
رپورٹس کے مطابق یہ جھڑپیں زیادہ تر شمال مشرقی صوبوں میں ہورہی ہیں جن میں دونوں جانب کا بھاری جانی نقصان ہورہا ہے۔
چند روز قبل بھی افغان فورسز نے طالبان کے خلاف کئی صوبوں میں آپریشن کیا تھا،آپریشن کے دوران ڈیڑھ سو سے زائد طالبان کو ہلاک کردیا گیا تھا۔
