The news is by your side.

Advertisement

فیفا کی جانب سے پاکستان پر عائد پابندیاں جلد ختم ہونے کا امکان

کراچی: پاکستانی فٹبال فینز کے لیے بڑی خوشخبری ہے کہ فیفا کی نامزد نارملائزیشن کمیٹی اور حکومت کے مذاکرات کامیاب ہوگئے ہیں۔

اے آر وائی نیوز کے مطابق پاکستان فٹ بال فیڈریشن میں باہمی چپقلش کا خاتمہ ہوا، فیفا کی نامزد نارملائزیشن کمیٹی اور حکومت کے درمیان مذاکرات کامیاب ہوگئے اور فٹبال ہیڈکوارٹرز نارملائزیشن کمیٹی کے سپرد کردیا گیا ہے۔

پاکستان فٹبال فیڈریشن اور فیفا نارملائزیشن کمیٹی کے درمیان یہ تنازعہ کم وبیش ڈیڑھ سال سے جاری تھا، وزیراعظم عمران خان کی خصوصی ہدایت پر اس مسئلے کو حل کیا گیا۔

چیئرمین نارملائز یشن کمیٹی ہارون ملک نے تنازعہ ختم ہونے پر خوشی کا اظہار کرتے ہوئے کہا کہ پاکستان فٹبال کی عالمی تنہائی کا برا دورختم ہوا، سارے معاملےمیں صبر وتحمل اور معاونت پر فیفا کےشکرگزار ہیں اب عالمی ایونٹس میں پاکستانی ٹیموں کی شرکت کو ممکن بنائیں گے۔

یاد رہے کہ گذشتہ سال مارچ میں پاکستان فٹ بال فیڈریشن (پی ایف ایف) کے شفاف انتخابات کرانے کے لیے فیفا ہاؤس لاہور کا چارج نارملائزیشن کمیٹی کے حوالے کیا تھا، بعد ازاں پاکستان فٹ بال فیڈریشن کے متنازع صدر اشفاق حسین گروپ نے زبردستی دفتر سے فیفا کمیٹی کو نکال کر تمام امور اپنے ہاتھ میں لے لیے تھے۔

انیس مارچ 2021 کو فیفا کی جانب سے فیفا ہاؤس لاہور کو خط لکھ کر آگاہ کیا گیا تھا کہ وہ دفتر کا قبضہ فیفا نارملائزیشن کمیٹی کے حوالے کردیں ورنہ ان کی رکنیت منسوخ کر دی جائے گی، تاہم پاکستان فٹ بال فیڈریشن کے متنازع صدر اشفاق حسین نے یہ حکم ماننے سے انکار کردیا تھا۔

Comments

یہ بھی پڑھیں