The news is by your side.

Advertisement

فیفا ورلڈ کپ 2018: عالمی میلے کا رنگا رنگ آغاز، روس کے ہاتھوں سعودی عرب کو شکست

یک طرفہ میچ کے دوران سعودی ولی عہد کی موجودی توجہ کا مرکز بنی رہی

ماسکو: کھیلوں کے سب سے بڑے عالمی میلے فیفا ورلڈ‌ کپ 2018 کا آغاز ہوگیا، افتتاحی میچ میں میزبان روس نے سعودی عرب کو یک طرفہ مقابلے میں شکست دے دی.

تفصیلات کے مطابق فیفا ورلڈ کپ 2018 کے اولین میچ میں روسی ٹیم نے سعودی عرب کی ناتجربہ کار ٹیم کو پانچ صفر سے ہارا دیا.

میچ کی ابتدا ہی سے روسی ٹیم غالب نظر آئی اور پے در پے حملے کر کے سعودی عرب کی دفاعی لائن کو تہس نہس کر دیا۔ 12 ویں منٹ میں غازینسکی نے روس کی جانب سے پہلا گول داغا۔

روس کی جانب سے دوسرا گول چیری شیف نے کیا، دوسرے ہاف میں زیوبا، چیری شیف اور گولوون نے شان دار گول اسکور کرکے روس کی جیت پر تصدیق کی مہر ثبت کر دی۔ آخری دو گول میچ کے اختتامی لمحات میں ہوئے۔

سعودی ولی عہد

جہاں‌ ورلڈ کپ 2018 کا اولین میچ  ہونے کے باعث روس اور سعودی عرب کے مقابلے کو خصوصی اہمیت حاصل تھی، وہیں سعودی ولی عہد محمد بن سلمان بھی توجہ کا مرکز بنے رہے۔

وہ میچ کے دوران روسی صدر ولادی میر پوٹن اور فیفا کے صدر گیانی انفینٹینو کے ساتھ بیٹھے نظر آئے، اس دوران دونوں میں مصافحہ اور خوش گوار ماحول میں گفتگو ہوئی۔

یاد رہے کہ کچھ عرصے سے محمد بن سلمان میڈیا سے دور تھے، جس کے باعث ان کی وفات کی افواہیں گردش کرنے لگیں، ان کے سامنے آنے کے بعد ان افواہوں نے دم توڑا۔

شام کے ایشو پر سعودی عرب اور روس کے شدید اختلافات کے پیش نظر بھی یہ منظر خصوصی اہمیت کا حامل تھا۔

افتتاحی تقریب کی جھلکیاں

فٹبال کے 21 ویں عالمی میلے کے آغاز سے قبل مختصر رنگا رنگ تقریب منعقد ہوئی، جس میں‌ روس کی ثقافت کے رنگ نمایاں تھے۔ 15 جولائی تک جاری رہنے والے عالمی کپ میں 64 میچز کھیلے جائیں گے.

ماسکو کے لزنیکی اسٹیڈیم میں منعقدہ افتتاحی تقریب میں برطانوی سنگر رابی ولیمز اور روس کی ایڈا نے ماحول گرمایا.

بعد ازاں ٹیموں کے جھنڈے میدان میں لائے گئے، عالمی کپ کے میسکوٹ زابی واکا اور پھر برازیلین لیجنڈ رونالڈو نے شائقین کو خوش آمدید کہا.

2010 کے عالمی کپ کی فاتح اسپین کے کپتان کیسی آس اور معروف روسی ماڈل نٹالیا وڈیا نووا نے 6 کلو وزنی 18 قیراط ٹرافی کی رونمائی کی، جس کے حصول کے لئے 32 ٹیمیں نبرد آزما ہوں گی.

روس کے صدر ولادی میر پیوٹن اور فیفا کے صدر گیانی انفینٹینو نے تقریریں‌ کی، جس کے بعد مقابلے کا باقاعدہ آغاز ہوا۔


فیفا ورلڈ کپ 2018: میگا ایونٹ کا آغاز آج ہوگا، رنگا رنگ تقریب سجے گی


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Print Friendly, PDF & Email

Comments

comments

یہ بھی پڑھیں