The news is by your side.

فیفا ورلڈ کپ، پرتگال نے پری کوارٹر فائنل میں جگہ بنا لی

قطر میں فیفا ورلڈ کپ میں سنسنی خیز مقابلے جاری ہیں اور برازیل کے بعد پرتگال نے بھی عالمی کپ کے ناک آؤٹ مرحلے کیلیے کوالیفائی کرلیا۔

اے آر وائی نیوز کے مطابق قطر میں جاری فیفا ورلڈ کپ میں پیر کے روز پرتگال نے یوروگوئے کو دو صفر سے شکست دے کر ناک آؤٹ مرحلے کے لیے کوالیفائی کرلیا۔

میچ کے ہیرو پرتگال کے برونو فرنانڈس رہے جنہوں نے دونوں بار گیند کو گول پوسٹ میں پہنچایا۔

برونو فرناڈس نے میچ کے 54 منٹ میں پہلا گول اسکور کیا جب کہ دوسرا گول فاؤل کے نتیجے میں ملنے والی پنالٹی پر بنایا۔

برونو نے اس کے بعد بھی مخالف یورگوئے کے گول پوسٹ پر حملے کیے اور کئی بار فٹبال کو جال میں پہنچانے کی کوشش کی لیکن کامیابی نہ مل سکی جس ک باعث وہ اس ورلڈ کپ میں پہلی ہیٹ ٹرک کرنے کے اعزاز سے محروم رہے۔

پرتگال کی جیت کے نتیجے میں اس نے 6 پوائنٹس کے ساتھ ناک آؤٹ مرحلے میں جگہ بنالی ہے۔
ٹورنامنٹ کے نویں روز کے ایک اور میچ میں کیمرون اورسربیا کا سنسنی خیز مقابلہ تین تین گول سے برابر رہا۔

گروپ جی کا دوسرا میچ کیمرون اور سربیا کے درمیان سنسنی خیز ثابت ہوا، کیمرون کے کیسٹیلیٹو نے 29 ویں منٹ میں پہلا گول کرکے ٹیم کو برتری دلائی۔ سربیا نے زبردست کم بیک کرتے ہوئے پہلے ہاف کے انجری ٹائم میں پولووچ کی گول کی بدولت مقابلہ برابر کردیا۔

دو منٹ بعد سیووچ نے دوسرا گول داغ دیا اور پہلا ہاف سربیا کی 1-2 کی برتری کے ساتھ ختم ہوا۔ میچ کے 53 ویں منٹ میں آغاز میں سربیا کے الیگزینڈر میٹرووچ نے گول کرکے کیمرون پر 1-3 کی برتری قائم کردی۔

پھر کیمرون کا شو شروع ہوا اور 4 منٹ میں 2 گول کرکے یورپین سائیڈ کے خلاف مقابلہ 3-3 سے برابر کردیا۔ پہلے ابوبکر نے 63 ویں منٹ میں گول کرکے خسارہ کم کیا، پھر 3 منٹ بعد ایرک میکسم کیمرون نے تیسرا گول کرکے میچ برابری پر پہنچا دیا۔

پیر کے روز کھیلے گئے دیگر میچز میں برازیل نے سوئٹزر لینڈ کو ایک صفر سے شکست دے کر ناک آؤٹ مرحلے میں جگہ پکی کرلی جب کہ گھانا نے دلچسپ مقابلے کے بعد جنوبی کوریا کو شکست سے دوچار کیا۔

Comments

یہ بھی پڑھیں