The news is by your side.

Advertisement

ٹاپ گن میورک: امریکی بحریہ کے فائٹر جیٹس کا لاکھوں ڈالرز کرایہ

معروف ہالی ووڈ اداکار ٹام کروز کی نئی فلم ٹاپ گن: میورک کامیابی کے ریکارڈز توڑ رہی ہے اور اس کی عکس بندی کے لیے بھی کروڑوں امریکی ڈالرز خرچ کیے گئے ہیں۔

ہالی وڈ کے بہترین اداکاروں میں سے ایک ٹام کروز کی فلم ٹاپ گن کا سیکوئل ٹاپ گن: میورک باکس آفس پر چھایا ہوا ہے۔ فلم میں فائٹر جیٹس کا جو ایکشن دکھایا گیا اس نے ناظرین کو مبہوت کردیا۔

رپورٹس کے مطابق پیرا ماؤنٹ پکچرز اسٹوڈیوز نے فلم میں استعمال ہونے والے ایک جنگی لڑاکا طیارے کے لیے فی گھنٹہ 11 ہزار 374 امریکی ڈالرز کرایہ ادا کیا۔

ٹام کروز کی زبردست اداکاری سے مزین نئی فلم میں نظر آنے والے حیرت انگیز طور پر حقیقت پسندانہ مناظر تخلیق کرنے کے لیے اسٹوڈیو نے امریکی بحریہ کے ساتھ ایف اے 18 سپر ہارنٹس جنگی طیارے لینے کا معاہدہ کیا۔

معاہدے میں یہ پابندی بھی شامل تھی کہ ٹام کروز کنٹرول کو چھو بھی نہیں سکتے۔

خیال رہے کہ ٹام کروز اپنے اسٹنٹس (کرتب) خود کرنے کے لیے مشہور ہیں، اور اصل ٹاپ گن فلم میں اداکاری کے دوران انہوں نے سنہ 1986 میں ایک جیٹ بھی اڑایا تھا۔

ٹام نے اصرار کیا کہ پائلٹس کا کردار ادا کرنے والے تمام اداکار بوئنگ کمپنی کے بنائے ہوئے لڑاکا طیارے اڑانا سیکھیں تاکہ اداکار پائلٹوں کی تجربہ کردہ کشش ثقل کی قوتوں (گریوی ٹیشنل فورسز) کو پوری طرح سمجھ سکیں۔

کروز نے اپنے ساتھی اداکاروں کے لیے فلائٹ ٹریننگ پروگرام بھی بنایا تاکہ وہ فضائی مشقوں کے دوران پرفارم کر سکیں۔

رپورٹس میں بتایا گیا ہے کہ پیرا ماؤنٹ پکچرز اسٹوڈیوز کو نہ صرف بحریہ کے طیاروں، طیارہ بردار بحری جہازوں اور فوجی اڈوں تک رسائی حاصل تھی بلکہ پینٹاگون کے انٹرٹینمنٹ میڈیا آفس سے اسکرپٹ کو منظور بھی کروانا پڑا تھا۔

ٹاپ گن: میورک کی عکس بندی انتہائی مہنگے ہونے کے باوجود، یہ پروجیکٹ ٹام کروز کے کیریئر کا بہترین افتتاحی پروجیکٹ بننے کے راستے پر ہے، توقع ہے کہ فلم اپنے ابتدائی ہفتے کے آخر میں تقریباً 130 ملین امریکی ڈالر کمائے گی۔

Comments

یہ بھی پڑھیں