پاکستان کے نامور ہدایتکار ابو الیہہ نے فہد مصطفیٰ کو فواد خان سے بہتر اداکار قرار دے دیا۔
معروف پاکستانی فلمساز ابو علیحہ نے ایک حالیہ پوڈکاسٹ کے دوران ملک کے دو بڑے سپرسٹارز کا موازنہ کرتے ہوئے فواد خان کے مقابلے میں فہد مصطفیٰ کو بہتر اور زیادہ ورسٹائل اداکار قرار دیا ہے۔ پوڈکاسٹ میں گفتگو کرتے ہوئے ابو علیحہ نے فہد مصطفیٰ کی مختلف اصناف میں اداکاری کی تعریف کی۔
انہوں نے کہا کہ فہد مصطفیٰ کا بطور اداکار دائرہ کار انتہائی شاندار ہے، وہ کبھی رومانوی کردار بخوبی نبھاتے ہیں تو کبھی مزاحیہ اور ایکشن کرداروں میں بھی چھائے رہتے ہیں، اور وہ انڈسٹری کا ایک بہت بڑا نام ہیں۔
فہد مصطفیٰ کی صلاحیتوں کو سراہتے ہوئے فلمساز کا کہنا تھا کہ جب بھی وہ آرٹ فلموں کی طرف قدم بڑھائیں گے تو سب کو دنگ کر دیں گے۔
View this post on Instagram
انہوں نے مداحوں کو مشورہ دیا کہ وہ ان کی فلم ’ماہِ میر‘ ضرور دیکھیں، جو 2016 میں ریلیز ہوئی تھی اور اس کی ہدایات انجم شہزاد نے دی تھیں جبکہ اس کا اسکرپٹ سرمد سہبائی نے تحریر کیا تھا۔ یہ فلم 18 ویں صدی کے مشہور اردو شاعر میر تقی میر کی زندگی پر مبنی تھی۔
فہد مصطفیٰ نے اپنے اداکاری کے کیریئر کا آغاز 2003 میں ٹیلی ویژن سیریز ‘امراؤ جان ادا’ سے کیا تھا، جس کے بعد انہوں نے ‘وینا’، ‘میں عبدالقادر ہوں’، ‘داغ’ اور ‘دوسری بیوی’ جیسے مشہور ڈراموں سے شہرت حاصل کی۔
انہوں نے 2014 میں نبیل قریشی کی ہدایت کاری میں بننے والی فلم ‘نامعلوم افراد’ سے فلمی دنیا میں قدم رکھا جو باکس آفس پر انتہائی کامیاب رہی۔
2016 میں انہوں نے فلم ‘ایکٹر ان لا’ پر بہترین اداکار اور سال کی بہترین فلم کے اعزاز حاصل کیے۔ اس کے علاوہ وہ 2014 سے پاکستان کے مقبول ترین گیم شو ‘جیتو پاکستان’ کی میزبانی بھی کر رہے ہیں۔
ٹیلی ویژن سے نو سال کے طویل وقفے کے بعد، فہد مصطفیٰ نے 2024 میں ہانیہ عامر کے ساتھ ڈرامے ‘کبھی میں کبھی تم’ سے شاندار واپسی کی، جس پر انہیں لکس اسٹائل ایوارڈ فار بیسٹ ایکٹر پاپولر سے نوازا گیا۔
دوسری جانب، فلمساز ابو علیحہ (جن کا اصل نام علی سجاد شاہ ہے) فلمی دنیا میں آنے سے قبل طویل عرصے تک صحافت سے وابستہ رہے اور انہوں نے انگریزی اور اردو اخبارات کے لیے کرائم اور انویسٹی گیٹو رپورٹر کے طور پر 15 سال خدمات انجام دیں۔
انہوں نے 2019 میں فلم ‘کتکش’ سے اپنی ہدایتکاری کا آغاز کیا اور بعد میں ‘تیور’، ‘ادھم پٹخ’ اور ‘ٹیکسالی گیٹ’ جیسی فلمیں بنائیں۔ ان کی فلم ‘جاوید اقبال: دی انٹولڈ اسٹوری آف اے سیریل کلر’ (جو ‘ککری’ کے نام سے بھی ریلیز ہوئی) نے انہیں بہترین ڈائریکٹر کا ایوارڈ دلایا اور اسے بین الاقوامی فلمی میلوں کے لیے بھی منتخب کیا گیا۔ ابو علیحہ بطور مصنف ایک درجن کتابیں بھی شائع کر چکے ہیں۔
